nepal life

पृथ्वीनारायणं नेपाः एकीकरण मखु, गोरखा राज्य विस्तार (किपाः व भिडियो स्वयादिसँ)

नेवा: अनलाइन न्युज – विजयरत्न | २०७४ पौष २७, बिहिबार १३:११:२६

गणतन्त्र नेपालय् जुजु पृथ्वीनारायण शाहया नामय् हाकनं थुगुसी पुस २७ गते पृथ्वी जयन्तीया दिं बिदा ब्यूगु व निसःत्याः दँसिबें अप्वः दँ न्हयः पृथ्वीनारायण शाह नं नेपाः एकीकरण याःगु मखु, थःगु गोरखा राज्य विस्तार याःगु धैगु सः ज्वनाः थौं बिहिवाः छगू विरोध सभा व मोटरसाइकल ¥याली  याःगु दु ।

नेवाः जागरण मञ्चया संयोजन व नेपाः युथ अर्गनाइजेशनया मंकाः ग्वसालय् येँया असनय् मुनाः किपूया छ्याकः ल्वहँतक मोटरसाइकल ¥याली न्ह्याकूगु खःसा वसिबें न्ह्यः असनय् छगू विरोध सभा नं जूगु खः ।

नेवाः जागरण मञ्चया नायः सुजीव बज्राचार्यं न्ह्याकूगु उगु विरोध सभाय् भाजु बज्राचार्यं ज्याझ्वः न्ह्याकेगु झ्वलय् पृथ्वीनारायण शाहथें जाःम्ह जुजुयात एकताया प्रतीक धकाः नालेगु धैगु थौंया गणतान्त्रिक राज्यय् छगू हास्यास्पद खँ धकाः धयादिल ।

अथेहे उगु विरोध सभाय् उपत्यकाव्यापी सतक विस्तार पीडित संघर्ष समितिया संयोजक सुमन साय्मिं पृथ्वीनारायण शाह नं उगु इलय् नेवाःतय्त याःगु क्रुर दमनयात आःतक राज्यं यानाः वयाच्वंगु दनि अले थुकिया हे दसू धैगु अव्यावहारिक सतक विस्तार खः धकाः नुगःखँ तयादीगु खः ।

ज्याझ्वलय् नेवाः न्ह्यलुवाः मल्ल के. सुन्दरं नेपालय् शाह वंशया शासन न्ह्यासांनिसें भाषिक अधिकारया दमन सुरु जूगु खः धकाः धयादीगु खःसा वय्कलं शाह वंशया शासनय् जनताया हितया खँ मजुसे थः सत्ताय् च्वनेया नितिं थीथी प्रपञ्च जूगु व थःहे दाजुकिजापिनिगु हत्या जूगु खँ कनादीगु खः ।

देसय् लोकतान्त्रिक गणतन्त्र पलिस्था जुइवं पृथ्वी जयन्तीया विदा क्वपाले धुंकूगु खःसा आः वयाः प्रधानमन्त्री शेरबहादुर देउवाया पालय् हाकनं बिदा ब्यूगु धैगु लज्जास्पद खँ खः धकाः भाजु सुन्दरं न्वःवानादीगु खः ।

भाजु सुन्दरं शाह वंश वयेन्ह्यः नेपाःया लागा इलाहावादतक दूगु खँ नं कनादीगु खः ।

(थन क्लीक यानाः भिडियो स्वयादिसँ)



येँया असनय् जूगु उगु विरोध सभाय् नेवाः जागरण मञ्चया संयोजन पुचःपाखें उमेश स्थापितं गोरखा राज्य विस्तार याःम्ह जुजुयात नेपाः एकीकरणया एकताया प्रतीक कथं आःया गणतान्त्रिक नेपाःया जनतां गबलें स्वीकार मयाइगु खँ तयादिलसा ज्याझ्वलय् नेपाः युथ अर्गनाइजेशनया श्यामकृष्ण प्रजापतिं नं थःगु नुगःखँ तयादीगु खः ।

असनय् जूगु उगु विरोध सभा क्वचायेकाः मोटरसाइकल ¥याली किपूपाखे न्ह्याःगु खः ।

Categorized in राष्ट्रिय