nepal life

पूर्वप्रधानमन्त्री कीर्तिधि विष्ट मन्त, शनिवाः अन्तिम दाहसंस्कार जुल

नेवा: अनलाइन न्युज | २०७४ कार्तिक २६, आइतबार १०:२८:५६

पूर्वप्रधानमन्त्री कीर्तिनिधि विष्ट शनिवाः मन्त । वय्कःया दाहसंस्कार शनिवाः जूगु खः ।

मदुम्ह विष्टया धार्मिक परम्पराकथं पशुपति आर्यघाटय् दाहसंस्कार जूगु खः । विष्टया सीम्हय श्रद्धाञ्जलि देछायेत पूर्वप्रधानमन्त्रीपिं लोकेन्द्रबहादुर चन्द व माधवकुमार नेपाल लिसें राप्रपाया नायः व पूर्वउपप्रधानमन्त्री कमल थापालिसेंया थीथी दलया नेतापिं सहभागी जूगु खः ।

ताःई न्ह्यःनिसें प्वाःया अर्बुद ल्वचं अस्वस्थ जुयाच्वनादीम्ह विष्ट ज्ञानेश्वरय् च्वंगु थःगु हे छेँय् शनिवाः सुथय् १० ता इलय् मदूगु खः ।

वय्कःया निम्ह काय व स्वम्ह म्ह्याय् दी । निदँ न्ह्यः वय्कःया जहान व छम्ह काय् मदूगु खः । येँया थमेलय् जन्म जुयादीम्ह विष्ट प्यक्वःतक प्रधानमन्त्री व तत्कालीन जुजु ज्ञानेन्द्रया नेतृत्वय् दयेकूगु सरकारय् उपाध्यक्ष जुयादीगु खः । वय्कःयात नेपाली राजनीतिइ नैतिकवान् नेताया रुपं कायेगु याः ।

बि.सं. २०३० सालय् सिंहदरबार मिँ च्यानाः ध्वस्त जुइधुंकाः राजीनामा बियाः पदीय नैतिकता क्यनादीम्ह पूर्वप्रधानमन्त्री कीर्तिनिधि विष्ट ९० दँया उमेरय् मदूगु खः ।

मदुम्ह विष्टं ल्याय्म्ह इलय् हे आपालं ई येँया वतुत्वालय् च्वनादीगु खःसा वय्कलं अन च्वंगु इलय् नेवाः भासं खँ ल्हायेगु यानादीम्ह खः । वय्कःयात चीनलिसे लिक्क लाम्ह मनू कथं नं कायेगु याःसा तत्कालीन जुजु महेन्द्रया पालय् निक्वः व जुजु वीरेन्द्रया पालय् नं प्रधानमन्त्री जुयादीगु दु ।

Categorized in राष्ट्रिय