nepal life

पुस २९ गते चिग्वः धिमे धेंधेंबल्लाः कासा याइगु

नेवा: अनलाइन न्युज | २०७४ पौष २५, मंगलबार १०:१८:५४

नेपालभाषा व संस्कृतिया संरक्षण, संवद्र्धन, उत्थान व ल्याय्म्हतय्त सांस्कृतिक व सामाजिक क्षेत्रय् क्रियाशील याकेगु आज्जुं स्वनागु थुगु पुचःया ग्वसालय् येँ महानगर दुने च्वंपिं ल्याय्म्हतय्गु प्रतिभा न्ह्यब्वय्गु व नेवाःलिसें हलिमय् हे लोकंह्वाःगु धिमे बाजं च्वन्ह्याकेगु आज्जुं न्हापांगु येँ महानगरव्यापी मेयर्स ट्रफि चिग्वः धिमे धेंधेंबल्लाः थ्व हे पोहेंलागाः द्वादशी (पुस २९ गते) शनिवाः याइगु जुगु दु ।
ग्वसाखलः किलाघः सांस्कृतिक पुचः नं म्हिगः छगू पत्रकार सम्मेलन यासे थकिया जानकारी ब्यूगु खः ।
पत्रकार सम्मेलनय् येँ महानगर दुनेया ३२ वडाया ६३ ज्यापु त्वाः खलः मध्ये मुक्कं २० गू खलःपुचःया ब्वति दुगु थुगु धेंधेंबल्लाखय् दुथ्याय्गु निंतिं वंगु पोहेंलाथ्व द्वादशी (पुस १५) तक ई बियाःगु व थुगु ई दुने दुतिंगु खलःपुचःतय् दथुइ जुइगु धेंधेंबल्लाय् न्हाप, लिउ व लियांलिउ लाःगु पुचःयात नगद सिरपाः, ट्रफी, मेडललिसें दसिपौ लःल्हाय्गु ज्याझ्वः दुगु जानकारी ब्यूगु खः ।
अथे हे पत्रकार सम्मेलनय् ज्याझ्वःपाखें नेवाः समुदायदुने लोकंह्वानाच्वंगु चिग्वः धिमे बाजंया संरक्षण व प्रवद्र्धन जुइगु विश्वास प्वकुसें धेंधेंबल्लाःलिसें नेवाः ल्याय्म्हतय्गु प्रतिभा न्ह्यब्वय्कथं थीथी सांस्कृतिक न्ह्यब्वया व थुगु ज्याझ्वलय् स्वकुमिपिनि निंतिं नेवाः नसात्वँसाया स्टल नं दइगुलिं छगू सांस्कृतिक महोत्सवकथं हे थुगु ज्याझ्वः दइगु जानकारी ब्यूगु दु ।
थुगु ज्याझ्वःयात येँ महानगरपालिका, नबिल फाउण्डेशनलिसें थीथी व्यक्ति व संस्थां आर्थिक ग्वाहालि यानादीगु दुसा तिकिझ्याः वाःपौ, रेडियो उपत्यका, काष्ठमण्डप टेलिभिजन, तिकिझ्याः न्यूज डटकम व नेवाः न्यूज डटकम अफिसियल मिडियाकथं ग्वाहालि यायेत्यंगु खः ।
फाइल किपाः

Categorized in नेवाः