nepal life

पुनःनिर्माणया नितिं गोरखा दरबार पिइगु ज्या

नेवा: अनलाइन न्युज | २०७४ फाल्गुण २, बुधबार ११:५४:२८

भुखाचं क्षति याःगु गोरखा दरबार पिइगु ज्या न्ह्याकूगु दु ।

थ्यंमथ्यं प्यसः दँ पुलांगु गोरखा दरबार थुनाः जगनिसें हे पुनःनिर्माण यायेत्यंगु खः । बि.सं. १९९० सालया भुखाचं क्षति मजूगु दरबार गोरखा बारपाक केन्द्र जुयाः ब्वःगु २०७२ बैशाख १२ य् ब्वःगु भुखाचं क्षति जूगु खः ।

बि.सं. १६८६ स गोरखाया जुजु राम शाहया पालय् उगु दरबार दयेकूगु खः । दरबार हेरचाह अड्डाया प्रमुख हरिप्रसाद भुसालया कथं जगनिसें थुनेगु ज्या जूगु उगु दरबार पुलांगु हे स्वरुपय् गथे खः अथेहे पुनःनिर्माण यायेगु जानकारी ब्यूगु दु । पुरातत्व विभागया कर्मचारीया उपस्थितिइ दरबार पिइगु ज्या जूगु खः ।

भाजु भुसालं धयादी, “पुलांगु हलंज्वलं चीकेगु ज्या जुयाच्वंगु दु । ज्या ख्यलय् जूगु हलंज्वलं हाकनं छ्यलेगु व ज्या ख्यलय् मजूगु हलंज्वलं वांछ्वयेगु जुइ । जग तयेगु ज्या जुयाच्वंगु दु ।”

पचली सिभा जेभीं दरबार पुनःनिर्माणया ठेक्का काःगु दु । ४ करोड ३७ लख तका दांया लगानीइ दरबार पुनःनिर्माण जुइ ।

भुखाय् ब्वःगु इलय् क्षति जूगु गोरखनाथ देगःलिसें संरचना धाःसा पुनःनिर्माण यायेधुंकूगु दु । दरबारय् च्वंगु जुजु पृथ्वीनारायण शाहया गद्दी लिसें महत्वपूर्ण हलंज्वलं धाःसा सुरक्षित थासय् भण्डारण याःगु दु ।

दरबार पिइगु ज्या याःबलय् बि.सं. १८६३ या ईया अप्पा नं लुयावःगु दु । वइगु स्वदँया दुने दरबार पुनःनिर्माण ज्या क्वचाइगु धाःगु दु ।

Categorized in स्थानिय-समाज