लुँ–वह व्यवसायी निरञ्जनरत्न शाक्य छम्ह व्यवसायी जक मखसे भाषाह्यःमि नं खः । भाषा, कला, साहित्य व संस्कृति प्रति मतिना दुम्ह नं खः । थुकथं थःगु बिस्कं म्हसीका दुम्ह निरञ्जनरत्न शाक्य थौंकन्हय् नेपालमण्डल राहत अभियानया नं छम्ह सक्रिय दुजः खः । तःभुखाचं पीडित नेपाःमिपिन्त ग्वाहालि यायेगु ज्याय् थःगु नुगः क्वसायेकाः वयाच्वनादीम्ह वयकःलिसे नेपालमण्डल राहत अभियानयात कयाः विजयरत्न असंबरें यानादीगु खँल्हाबल्हाया छपुलु ।

नेपालमण्डल राहत अभियानया नीस्वनेगु ज्या गुथकं जुल ?

• बैशाख १२ गते देशय् ब्वःगु तःभुखाचं आपालं धनजन व सम्पदा क्षति जुल । अज्यागु विनाश स्वयाः मख्वःगु नुगः हे मदु जुइमाः । उकिसनं नेवाः सांस्कृतिक सम्पदा व पुलांपलांगु आपालं नेवाः बस्ती बामलाक्क हे क्षति जुल । थुकथं जूगु क्षति स्वयाः ख्वःगु नुगःयात भचासां क्वलाकेगु मन तयाः छथ्वः नेवाःत मुना । उद्योगी व्यवसायी व समाजसेवी लक्ष्मीदास मानन्धर, नेवाः न्ह्यलुवाःपिं पद्मरत्न तुलाधर, मल्ल के सुन्दर, वित्त व्यवसायी राजेन्द्रमान शाक्य, नेवाः जागरण मञ्चया नायः सुजीव बज्राचार्य, संस्कृतिविद डा. चुन्दा बज्राचार्य लगायत आपालं मनूत मुनाः छलफल जुल । छलफलय् तःभुखाचं कयाः सास्ती नयाच्वंपिन्त राहत बिइगु आज्जु ज्वनाः नेपालमण्डल राहत अभियान धकाः नां छुनाः थ्व अभियान नीस्वंगु खः ।

राहत मण्डलया संरचना गुकथं दु ?

• थ्व छगू स्वतन्त्र प्रकृतिया अभियान खः । छुं नं कथंया संस्था मखु । थुके दक्व ख्यःया नेवाःत दुथ्यानाच्वंगु दु । अले थुकिइ नायः वा छ्याञ्जे धइगु पद नं मदु । थुकिइ दुथ्याःपिं सकलें थ्व अभियानया दुजः खः । अले थुकिइ दुथ्याःपिं दुजःपिं थीथी कवःया दुजःकथं च्वना थःथःगुपाखें राहत, उद्धार व पुनर्वासया ज्या न्ह्याका वयाच्वंगु दु । धात्थें धायेगु खःसा भुखाचं पीडितपिं जुयाः नं राहत कायेगु ज्याय् न्ह्यचिले मफुपिंत ग्वाहालि यायेगु निंतिं हे नेपालमण्डल राहत अभियान नीस्वंगु खः ।

थ्व अभियानया कवः, कचा नं दु ला ?

• नेपालमण्डल राहत अभियान धकाः नीस्वने धुंकाः उकिइ थीथी कवः नीस्वनागु दु । उच्चस्तरीय कवःदुने नेवाः न्ह्यलुवाःपिं पद्मरत्न तुलाधर, मल्ल के। सुन्दर, लक्ष्मीदास मानन्धर, हिसिला यमि, राजेन्द्र श्रेष्ठ, दिलीप महर्जन, तीर्थराम डंगोल,  डा। महेशमान श्रेष्ठ, लक्ष्मण राजवंशी, पवनमान श्रेष्ठ, जीवनराम श्रेष्ठ, राजेन्द्रमान शाक्य,  नरेशवीर शाक्यपिं च्वनादीगु दु । अथेहे मेमेगु कवः कथं कार्यान्वयन कवः, स्वंयसेवक कवः, संचार कवः, प्राविधिक अनुगमन कवः, तथ्यांक कवः, स्वास्थ्य शिविर कवः, कानुनी परामर्श कवः, राहत व्यवस्थापन कवः, सम्पदा कवः नीस्वनातःगु दु ।

थ्वः अभियानं छु छु ज्या यायेधुंकल ?

• थुकिं दकलय् न्हापां राहतया ज्या न्ह्याकूगु खः । राहतया सामग्री इनेगु झ्वलय् जिमिसं भुखाचं प्रभावित यक्व थासय् आपालं मनूतयत राहत सामग्री इना । जिमित धम्मवति गुरुमां नं द्वःछि सिबें अप्वः राहत प्याकेज छ्रवया हयादिल । भारतीय राजदूतावासया ग्वाहालिं धम्मकीर्ति विहारय् वःगु उगु राहत प्याकेजय् बजि, जाकि, टर्च लाइट, ची, चिनि तयाःतःगु दु । अनं लिपा नेपालमण्डल राहत अभियानपाखें हे न्यानाः जाकि, बजि व मेमेगु नसात्वँसाया ज्वलं नं न्याना बिया । लिपा जिमिसं त्रिपाल नं न्यानाः भुखाचं कःपिन्त बिया ।

राहतया ज्याय् आर्थिक संकलन गुकथं चूलानाच्वंगु दु ?

• राहत अभियान नीस्वनागु न्हि कुन्हु हे नुगः क्वसाःपिं छुं छुं मनूतसें थःम्हेसिनं हे भचा भचा दां तयाब्यूगु खः । लिपा वनाः थुकिइ आर्थिक ग्वाहालि यायेत आपालं न्ह्यचिलादिल । जापान, चीन, अमेरिका, लण्डन, अष्ट्रेलिया थेंज्यागु देशय् च्वना वयाच्वंपिं नेपाःमिपिन्सं नं थ्व अभियानयात नुगः क्वसायेका आर्थिक ग्वाहालि याना वया च्वंगु दु ।

थ्व अभियानया मेगु पलाः छु जुइ ?

• आःया पलाः धइगु भुखाचं कया छेँ मदयेका च्वंपिन्त अस्थायी बसोबास बीया निंतिं ज्या न्ह्याकाच्वनागु दुु । थुकिइ अरनिको समाजं चीनपाखें वःगु टेण्ट–छेँ नं नेपालमण्डल राहत  अभियानयात बिया ग्वाहालि याःगु दु । टेण्ट–छेँ धुंकाः जस्तापाताया व्यवस्था यानागु दु । अले एकिकृत नेवाः बस्ती विकासया निंतिं नं पलाः न्ह्याकेगु ग्वसाः दुसा भुखाचं क्षति जूगु छुं छुं सम्पदाया पुननिर्माणया ज्या यायेगु ग्वसाः नं दु ।

अन्तय् धाये ल्यं दनीगु छुं दु ?

• भुखाचं कयाः पीडितपिन्त ग्वाहालि यायेत न्ह्यःने वःथें हे तुं मेमेबलय् नं नेपाःमिपिन्त परे जुइबले सकलें न्ह्यचिलाः ग्वाहालि यानाच्वने फत धाःसा नेपालमण्डल राहत अभियानं न्ह्याकूगु थ्व पलाः सार्थक जुइ थें च्वं । सुभाय् ।