nepal life

पार्टी हिलाः निर्वाचन त्याकूपिं नेतात

नेवा: अनलाइन न्युज | २०७४ पौष ३, सोमबार १४:३९:४५

कपिलवस्तु–२ पाखें प्रतिनिधिसभा दुजलय् चुनाव त्याकूम्ह बृजेश गुप्ताया थ्व प्यक्वःगु विजय खः । तर थ्व फुक्क छगू हे दलया उम्मेदवारया रुपं त्याकूगु धाःसा पक्का नं मखु ।

२०५६ सालय् विद्युत प्राधिकरणया इन्जिनियरपाखें राजीनामा बियाः राजनीतिइ पलाः तयादीम्ह गुप्तां चुनावी लिच्वःयात थःगु पक्षय् लाकेत पार्टी हिलाः राजनीतिक मैदानय् कुहाँ वःगु खः ।

पार्टी हिलाः चुनाव ल्वाःम्ह गुप्ताया नितिं सदां जीत ल्हातय् लाःगु दु । २०५६ सालय् राप्रपापाखें चुनाव त्याकूम्ह गुप्ता मधेस आन्दोलनया क्रान्ति वःगु इलय् २०६४ सालय् तराई मधेस लोकतान्त्रिक पार्टीइ दुहाँ वन । वहे पार्टीपाखें गुप्तां २०६४ व २०७० सालया संविधानसभा चुनाव त्याकल ।

२०४८ सालनिसें मधेसय् प्रभावशाली नेता हृदयेश त्रिपाठी नं दल हिलाः चुनाव ल्वाःम्ह नेता खः । नेपाल सदभावना पार्टीपाखें २०४८ साललिपा स्वक्वःतक चुनाव त्याकूम्ह त्रिपाठीं संविधानसभाया निगू चुनाव तराई मधेस लोकतान्त्रिक पार्टीपाखें ल्वाःगु खःसा न्हापांगु संविधानसभाया चुनाव आपालं मतं त्याकूगु खः ।

२०६४ सालया संविधानसभा चुनावय् कपिलबस्तु ५ पाखें फोरम नेपालया अभिषेकप्रताप साह नं चुनाव त्याकल । पुलांम्ह नेता तराई मधेस लोकतान्त्रिक पार्टी तमलोपाया डा. मञ्जुर आँयात बुकुसें २६ दँया साह दकले कान्छाम्ह सभासद् जुइधुंकाः चर्चा परिचर्चा जूगु खः । संघीय समाजवादी फोरमया उपमहासचिव जुयाः चीहाकःगु इलय् पार्टीया केन्द्रीय नेतृत्वय् थ्यंकेत साह नं थुगुखुसि चुनाव त्याकेत कांग्रेस पार्टी ल्यःगु खः ।

पश्चिम नवलपरासी १ क य् एमालेपाखें चुनाव त्याःम्ह अजय शाही नं पार्टी हिलाः चुनाव ल्वाःम्ह नेता खः । शाहीया धाःसा थुगु जीत न्हापांगु जीत खः ।

मधेस आन्दोलनया क्रान्ति लिसें मधेसी जनअधिकार फोरमय् सक्रिय जुयाः केन्द्रीय दुजः जूम्ह बसुद्दिन खाँ नं थुगुखुसि कांग्रेस पार्टी ल्ययाः फाइदा काःगु दु ।

रुपन्देही ४ क पाखें खाँ नं चुनाव त्याकूगु खः । वंगु संविधानसभा चुनावय् खाँ रुपन्देही ६ पाखें संघीय समाजवादी फोरमया उम्मेदवार खः ।

(थौं ने.सं. ११३८ पुस ३ गते नागरिक न्हिपती पिदंगु बुखँ)

Categorized in पत्रपत्रिका