nepal life

पाप–पुण्य–धर्म (चिनाखँ)

–रीदेन महर्जन

किपू—१

पाप–पुण्य–धर्म धयागु छुं खः ?
जिं मसिल, जि मथुल !
झी नेवाः जुयानं जुयानं
झीस मांभासं नुगः चकंकाः
नुगलय् स्वाँ ह्वयेकाः नुगः सः थ्वयेकाः
मांभाय्यात मतिना मयासे
खल्हाबल्हा याइमखु
थ्वहे दकले तधंगु पाप जुइ ।।

झी नेवाः जुयाः मांभासायात
ध्याकुनय् वांछ्वयाः भ्वासि जुयाः
थःथवय् गालय् नर्कय् कुहां वनाः
कर्किया भाय् छ्यलाः
दास जुयाः खँ ल्हाइ
दकले तःधंगु हिंसा जुइ
अले पुण्य धयागु थ्वहे जुइ ।।

झीसं झीगु मांभाय्यात गुलि मतिना याइ
उलिहे झीत मतिना याइ
दुनुगलं थुइकाः झी झी जानाः
झीगु मांभाय्यात हःपाः बियाः
थकायेगु ज्या न्ह्याकी
थ्वहे दकले तःधंगु पूण्य जुइ ।।

झीगु मांभाय् दैवी–शक्तिं जाःगु
प्राकृतिक विशुद्ध भाय्
झीगु कर्म मांभाय्यात म्वाकेगु जुइमाः
अलेजक हलिमय् झी ल्यनी
झीगु पुस्ता ल्यनी
छुं नं तनिमखु
छुनं न्हनिमखु
मखुला धैगु जूसा
झीपिं फुक्क सून्यताय् तनावनी
गनावनी छुं नं ल्यनिमखु
छुं नं दइमखु
झीगु सभ्यता संस्कृति झीगु म्हसीका
फुक्क न्हनावनी
झीगु भक्तियात शक्तिइ हिइकेगु
झीपिं नेपाःमि छप्पंछधी जायेगु
झीगु नेपालभासा हे खः
गुबले तिबः बियाः थकायेगु
ज्याझ्वः न्ह्याकेगु
थ्वहे विशुद्ध धर्म जुइ ।।

सुभाय्–जय मांभाय्