nepal life

न्हूदँया लसताय् दि शाक्य फाउण्डेशनया तुच्चा ज्याझ्वः

नेवा: अनलाइन न्युज | २०७४ कार्तिक २५, शनिबार १६:४१:५८

दि शाक्य फाउण्डेशन नेपालं न्हूदँया लसताय् तुच्चा ज्याझ्वः याःगु दु ।
थौं शनिवाः येँया क्षेत्रपाति पार्टी प्यालेसय् न्हूदँ ११३८ या लसताय् थथे तुच्चा ज्याझ्वः याःगु खः । लिसें उगु तुच्चा ज्याझ्वलय् येँ महानगरपालिकाया मेयर विद्यासुन्दर शाक्ययात मेयर पदय् निर्वाचित जुयादीगुलिं हनेज्याझ्वः नं याःगु खः ।
अथेहे, थीथी बहीया थकाली शाक्यपिन्त सम्मानया लिसें आजीवन दुजः लःल्हाःगु दु ।
फाउण्डेशनया नायः अमृतमान शाक्यया सभापतित्वय् जूगु उगु ज्याझ्वलय् मेयर विद्यासुन्दर शाक्यं येँ महानगरपालिकापाखें छुं नं कथंया ग्वाहालि कायेगु नितिं न्ह्यचिलादीत इनाप यासें न्हूदँया लसताय् सकलसित भिंतुना देछानादीगु खः ।

ज्याझ्वलय् न्हूदँ समारोह समितिया दुजः सुजीव बज्राचार्यं न्हूदँया लसताय् तुच्चा ज्याझ्वः याःगुलिं सुभाय् देछासें भिंतुना तुच्चा ज्याझ्वःया लिसेलिसें न्ह्यःने वयाच्वंगु निर्वाचनयात कयाः राजनीतिक रुपं न्ह्यायेत इनाप यानादिल । अथेहे, वय्कलं नेवाः जागरण मञ्चं मंसीर २१ गते जुइत्यंगु चुनावय् ३ नम्बर प्रदेशपाखें दनीपिं उम्मेदवारपिन्सं म्हतिं नं थुगु प्रदेशया नितिं यायेमाःगु ज्या कथं ९ बुँदे ध्यानाकर्षण पौ हःगु जानकारी बियादिसें उकीमध्ये छगू नेपाल संवतयात राज्यं छ्यलाबुलाय् हयेकेगु नितिं वचं बिइपिं उम्मेदवारपिन्त त्याकाछ्वये नु धकाः इनाप यानातःगुलिं शाक्य फाउडेशनया दुजःपिन्सं थुगु चुनावय् नेपाल संवतया खँ उम्मेदवारपिनिगु न्ह्यःने ल्ह्वनेत इनाप यानादिल ।
ज्याझ्वलय् फाउण्डेशनया दुजः देवरत्न शाक्यं न्हूदँया लसताय् जूगु ज्याझ्वलय् ब्वति कयादीगुलिं सकलसित सुभाय् देछानादीगु खः ।

Categorized in नेवाः