nepal life

न्हूगु शिक्षां हःगु पश्चिमा संस्कृति

२०७४ मङ्सिर २८, बिहिबार २३:००:३७

कमला
नेपाःया परिस्थिति छगू गतिशीलरुपं परिवर्तन वयाच्वंगु दु । थुकी सकारात्मक व नकारात्मक नितां दु । देसय् लोकतन्त्र वल । थ्व सकारात्मक खः, गणतन्त्र वल थ्व सकारात्मक खँ खः । तर थुकिया ल्यूल्यू थन अशान्ति, असुरक्षा व राजनैतिक दादागिरी सुरु जुल थ्व नकारात्मक पक्ष खः । अथेहे देय्या परिवर्तन नापं शैक्षिक ख्यलय् नं उतिकं हे परिवर्तन वःगु दु । शैक्षिक ख्यलय् छगूकथं धायेगु खःसा बांलाःगु परिवर्तन वःगु दु । स्तरीय शिक्षा काये खनावःगु दु । तर थुकी नं क्वबुइ थाकुगु फीया भार ला द हे दु मेगु थन स्पष्ट शिक्षा नीति मदुगु कारणं जुयाच्वंगु ढिलासुस्ती व मेमेगु नकारात्मक पक्ष नं दु । अथेहे छगू देशया धर्म संस्कृतियात नं प्रभाव जुइगु छगू विषय जू वंगु दु – पश्चिमी देय्या प्रभाव ।


खय्तला न्हूगु शिक्षां हःगु प्रभाव धकाः तप्यंक धाये मछिंगु थ्व पश्चिमी देय्या सांस्कृतिक प्रभावया खँ “ दुने गुलिखे सकारात्मक पक्ष नं दु धाःसा उप्वः नकारात्मक पक्ष नं दु । थन पश्चिमी देय्या यक्व बांलाःगु ख“ दयाः नं उकिया नक्कल यायेगु उलि चलन मदु । तर बांमलाःगु खँय् तुरुन्त हे नक्कल जुइ धुंकी । थज्याःगु ज्या विशेष यानाः युवा पुस्तां याइगु खः । युवा पुस्ता धैगु उप्वः धइथें विद्यार्थीत नं लाः । उकिं शिक्षाया थीथी ख“ नापं इपिं ब्वनीगु कलेजया वातावरण नं इमित पश्चिमी संस्कृतिया अनुशरण नं इमित पश्चिमी संस्कृतिया अनुशरण यायेगु लँय् प्रेरित याःगु खनेदु ।
थन ल्याय्म्ह पुस्तां थःपिनि परम्परागत सांस्कृतिक धार्मिक खँयात विस्तारीं त्वःता वनाच्वंगु दु । थ्व पुस्तां थःपिनिगु फुक्कं गौरवपूर्ण रितिरिवाज त्वःताः वनेगु खःसा थ्वयां लिपाया पुस्तां झीगु संस्कृति तजिलजि गथे याना स्वये खनी न्ह्यसः चिं नापं दनावःगु दु ।
न्हापा जूसा मिसा मिजं नापं जुइगु तकं बेक्वः मिखां स्वैगु । थौंकन्हय् सकसियां न्ह्यःने गुकथं जुइ च्वयाच्वने माःगु खँ मखय् धुंकल । पश्चिमी खुल्ला यौनया प्रचारं थुगु वर्गयात बांमलाक्क आकर्षण याःगु दु । अथेहे पश्चिमी फेशनं नं उतिकं हे आकर्षण याःगु दु । थःपिनि कलेज चले यायेत आकर्षक युनिफोर्म तयेगु नामय् कलेजतय्सं नांजकया मिनिस्कर्टतकं व्यवहारय् हयाच्वंगु दु । गुगु खँ पूर्ण रुपं पश्चिमी संस्कृति प्रभावित खः । अझं धायेगु खःसा पश्चिमी देशया कलेजया युनिफर्म तकं थथे चीहाकःगु मिनिस्कर्ट जुइमखु जुइ ।


मेखे स्कूल कलेजया ल्याय्म्ह नच्चा ल्याय्म्हपिं विद्यार्थीतय्सं हनीगु नखः नं पश्चिमी संस्कृतिं प्रभावित जूगु खनेदु । थौंकन्हय् दकलय् लोकंह्वाःगु युवातय् नखः खः भ्यालेन्टाइन डे ।
मतिना दिवस युवातय् दकलय् आकर्षण दुगु दिवस खः । लिपांगु इलय् क्यंगु छगू तथ्यांकं थुखुन्हु दिनय् गुलाफ स्वयां कण्डमया विक्री उप्वःगु ख ल्याय्म्हत गुखेपाखे आकर्षित धैगु क्यं । थन थौं मतिना कन्हय् त्वःतेगु फेशन नं चले जुइ धुंकल । थुकथं ल्याय्म्ह पुस्ता न्हू शिक्षाया नामय् आधुनिक जुइगु नामय् पश्चिमी संस्कृतिं प्रभावित जुयावनाच्वंगु दु । थःगु संस्कृति बचे यायेया नितिं थुगु इलय् विज्ञतय्सं युवा जमातयात आकर्षण यायेकथंया योजना पित हयेमाःगु स्थिति दु । थुकियात सकसियां बांलाक विचाः याना स्वयेमाःगु खनेदु ।