nepal life

न्हापांगुखुसि बुकल नेपालं भारतयात

नेवा: अनलाइन न्युज | २०७४ कार्तिक २६, आइतबार १६:०९:४३

मलेसियाय् जुयाच्वंगु एसीसी अन्डर–१९ एसिया कपय् नेपालं भारतयात अजूचायापुक्क त्याकूगु दु ।

बायुमास ओभलय् जूगु कासाय् नेपालं भारतयात १९ रनं बुकूगु खः । नेपालं भारतयात छुं नं कासाय् बुकूगु मदुनि, थ्वहे न्हापांगुखुसि खः नेपालं भारतयात बुकूगु । भारतया बुकेधुंकाः नेपाः सेमिफाइनल थ्यनीगु सम्भावना नं लिक्क लाःगु दु ।

नेपालं ब्यूगु १८६ रनया सामान्य लक्ष्य काःगु भारतं ४८.१ ओभरय् फुक्क विकेटया क्षतिइ १६६ रन जक दयेकेफूगु खः । भारतया नितिं कप्तान हिमांशु रानां ४६, मन्जोत केर्लां ३६ व अभिषेक शर्मां २७ रन दयेकूगु खः । भारतया मेपिं ब्याट्सम्यान धाःसा अःपुक्क हे आउट जूगु खः । भारतया अनुज रावतं १८ व अथर्भा टाइडें १३ रनया योगदान ब्यूसां नं नेपाःयात त्याके धाःसा मफुत ।

नेपाःया जितय् कप्तान दिपेन्द्र सिंह ऐरीं उत्कृष्ट प्रदर्शन याःगु खः । वया अलराउण्डर प्रदर्शनय् नेपालं भारतयात ऐतिहासिक जित दर्ता याकूगु खः । नेपाःया दिपेन्द्र सिंह ऐरीं ४, शाहब आलम व पवन सर्राफं समान २–२ विकेट काःगु खः ।

थ्वसिबें न्ह्यः मलेसियाया क्वालालम्पुरय् च्वंगु बायुमस ओभलय् टस बुकाः न्हापां ब्याटिङ याःम्ह नेपालं मुक्कं ५० ओभर म्हिताः ८ विकेट गुमे यानाः १८५ रन दयेकूगु खः । नेपाःया मध्यम स्कोरय् कप्तान दिपेन्द्र सिंह ऐरीं उत्कृष्ट ब्याटिङ प्रदर्शन याःगु खः । अर्धशतकीय पारी म्हितूम्ह दिपेन्द्रं ८८ रनया योगदान ब्यूगु खः ।

अथेहे, नेपाःया जितेन्द्र सिंहं ३६ रन मुंकूबलय् भीम सार्कीं १५ रन मुंकूगु खः । सन्दिप लामिछानें ९ व किशोर महतों ७ रनय् अविजित जुल । वबाहेक नेपाःया अनिलकुमार साह व रोहितकुमार पौडेलं समान ६–६ रन दयेकाः कमल सिंह ऐरीं ५ व आसिफ शेखं ३ रन दयेकाः पेभेलियन लिहाँ वंगु खः । भारतया आदित्य थाक्रे व अभिषेक शर्मां समान २–२ विकेट काःगु खः ।

Categorized in कासा