nepal life

न्यूज अपडेटः मिडिया फेस्टिबल तःजिक क्वचाल (भिडियो स्वयादिसँ)

नेवा: अनलाइन न्युज – ललेन्द्र शाक्य | २०७४ पौष २२, शनिबार १७:५०:०१

नेवाः राष्ट्रिय पत्रकार दबूया ग्वसालय् थौं शनिवाः यलया लायकूया भण्डारखाल क्यबय् न्हापांगु मिडिया फेस्टिबल ११३८ तःजिक क्वचाल ।

फेस्टिबलया उलेज्या शताब्दी पुरुष सत्यमोहन जोशीं त्वाःदेवाय् मत च्याकाः यानादीगु खः । उगु ज्याझ्वलय् भाजु जोशी न्हापांम्ह समावेशी पत्रकार जूगुलिं वय्कःयात तःजिक हंगु खः । भाजु जोशी २००९ सालय् दकले न्हापां ‘कलाकार’ नांया नेवाः, नेपाली, हिन्दी व अंग्रेजी भासाया पत्रिका पिथनादीगुलिं वय्कःयात थुकथं न्हापांम्ह समावेशी पत्रकार कथं हंगु खः ।

उगु ज्याझ्वलय् पत्रकार दबूया लुमन्ति पौ, अथेहे नेपाल पत्रकार महासंघया संस्थापक नायः सत्यनारायण बहादुर श्रेष्ठ, मातृभाषा पत्रकारिताय् न्हापांम्ह पत्रकार धर्मादित्य धर्माचार्यया किपाः दूगु नगुमा (क्यालेण्डर) पितब्वज्या, नेवाः पत्रकारपिनिगु नां धलः डायरी पितब्वज्या याःगु खः ।

दबूया महासचिव सुनिल महर्जनं लसकुस यानादीगु उगु ज्याझ्वलय् सूचना विभागया महानिेर्देशक, प्रेस काउन्सिलया कार्यबहाक नायः किशोर श्रेष्ठ, समावेशी पत्रकारितायात कयाः नुगःखँ तयादीगु खः ।

अथेहे, सुभाय् फेस्टिबलया कजि लिसें दबूया केन्द्रीय दांभरी सुरेन्द्रभक्त श्रेष्ठं बियादीगु खःसा ज्याझ्वः बदूया छ्याञ्जे केके मानन्धरं न्ह्याकादीगु खः । ज्याझ्वः पत्रकार दबूया नायः श्रीकृष्ण महर्जनया सभापतित्वय् जूगु खः ।

अथेहे, निक्वःगु चरणया ज्याझ्वः कथं महालक्ष्मी नगरपालिकाया मेयर अथेहे किपू नगरपालिकाया मेयर रमेश महर्जनं मातृभाषा पत्रकारिताय् स्थानीय जनप्रतिनिधिपिनिगु दायित्व व ग्वाहालियात कयाः थःगु नुगःखँ तयादीगु खः ।

स्वक्वःगु चरणया ज्याझ्वः कथं समावेशी संचारया विषयस बहस ज्याझ्वः जूगु खः । उगु ज्याझ्वलय् राजनीतिक विश्लेषक सिकेलाल, पत्रकार युवराज घिमिरे व सुरेश किरण मानन्धरपिन्सं ब्वति कयादीगु खः । थुगु बहस ज्याझ्वः दबूया मूछ्याञ्जे सुनिल महर्जनं न्याकादीगु खः ।

उगु ज्याझ्वलय् थीथी मिडिया प्रकाशन गृहपाखें स्टलत तःगु खःसा सांस्कृतिक ज्याझ्वः नं जूगु खः ।

(थन क्लीक यानाः भिडियो स्वयादिसँ)

Categorized in नेवाः