nepal life

न्यूज अपडेटः ख्वपय् शिरीष तामाङयात धुं नःगु प्रमाणित

नेवा: अनलाइन न्युज | २०७४ फाल्गुण १, मंगलबार १२:२८:२१

सूर्यविनायक नगरपालिका–७ गुण्डु लः ट्यांकीइ धुँया आक्रमणपाखें छम्ह मचाया ज्यान वंगु दु ।

सोमवाः सनिलय् पसः वंम्ह मचा छेँय् लिहाँ वयेगु झ्वलय् गुण्डु खहरे च्वनीम्ह सुनिल तामाङया खुदँ दुम्ह काय् शिरीष तामाङयात धुं लुया जंगलय् यंकाः नःगु प्रहरीं जानकारी ब्यूगु दु ।

पसः वंम्ह मचा शिरीष छक्वलं बेपत्ता जुइधुंकाः मालेगु ज्या याःगु खः । उकथं मालेगु ज्याय् स्थानीय बासिन्दा, प्रहरी, नेपाली सेनाया पुचलं बहनी १०ः३० ता इलय् बालकुमारी सामुदायिक वनय् मचाया सीम्ह लुयावःगु महानगरीय प्रहरी परिसर ख्वपया प्रवक्ता कृष्ण प्रसाई नं जानकारी बियादीगु दु ।

धुं मचायात आक्रमण यानाः बेपत्ता याःगु आशंका यानाः मालेगु ज्या याःबलय् धुं जंगलय् मचायात नयाच्वंगु अवस्थाय् लुइकूगु खःसा मनूतय्गु भीड खनेधुंकाः धुँ बिस्युं वंगु जुइफूगु प्रहरीया धापू खः । सीम्ह परीक्षणया नितिं ख्वप अस्पतालय् यंकूगु खः । धुं मचा नःगु घटना लिपा सनिल व सुथय् न्यासी वनीपिं स्थानीय बासिन्दापिं ग्याःचिकुइ लाःगु दु ।

बालकुमारी सामुदायिक वनय् छ्यं चहिलाच्वंगु व खम्पा मदूगु अवस्थाय् मचाया सीम्ह लुयावःगु प्रहरीं जानकारी ब्यूगु दु । थुकिया बारे थप अनुसन्धान जुयाच्वंगु जानकरी ब्यूगु दु ।

थ्व नं ब्वनादिसँ

ख्वपय् तनाच्वंम्ह खुदँया शिरीष तामाङ सिनाच्वंगु अवस्थाय् लुल

 

Categorized in दुर्घटना-अपराध