नेवाः संकिपाया ख्यलय् व्यस्तम्ह सुरज व्यञ्जनकार
नेवा: अनलाइन न्युज – विजयरत्न | २०७४ कार्तिक १०, शुक्रबार १६:१०:५३
थौंकन्हे दयेकाच्वंगु नेवाः संकिपाया नां कायेबले च्वापुफय्, रश्मी, जामन गुभाजु, मां, बसन्त ऋतु, हिसिमती, वाःया दुने जाकी दु, लिबाय् धुंकाः, लाखे भाजु थेंज्याःगु संकिपाया नां न्ह्यःने वइ ।
थ्व गुंगुलिं संकिपा मध्ये प्यंगु संकिपाय् म्हिताच्वंम्ह छम्ह कलाकारया नां सुरज व्यञ्जनकार खः । थगुने सुरज व्यञ्जनकारं म्हितूगु “स्वय्नगु” पिदन । उगु संकिपाय् छम्ह सुस्त मनस्थितिम्ह मतिनामिया भूमिकाय् धिसिलाक्क अभिनय न्ह्यब्वःया तारिफया पात्र जुइत ताःलाम्ह खः सुरज व्यञ्जनकार ।
आःतक सीदु कथं थुगुसी पिदनीगु झ्वलय् लानाच्वंगु “रश्मी”, “च्वापु फय्”, “जामन गुभाजु”, “लाखे भाजु” व “मां ” संकिपाय् व्यस्त जुयाच्वंम्ह सुरज व्यञ्जनकारं थुगुसी हे मेमेगु संकिपा नं म्हितीगु खँ दु ।
थथे अभिनयया ख्यलय् व्यस्त जुयाच्वंम्ह कलाकार सुरज व्यञ्जनकारं दकले न्हापा अभिनय याःगु धइगु “सितुलानी” नांयागु टेलिसिरियल खः । नांजाम्ह ख्यालिम्वः श्रीकृष्ण अणुं दयेकेज्याः न्ह्याकूगु थ्व “सितुलानी” संकिपाया दयेकाच्वंगु हे इलय् श्रीकृष्ण अणु आकाझाकां म्हंमफुतसा ताःईतक उसाँय् मदय् धुंका श्रीकृष्ण अणु आकाझाकां थ्व संसार त्वःता वंबले उगु संकिपा पिहाँ वयेमफुत ।
व धुंकाः सुरजं हिसिमदु व बकम्फुसुल व मेमेगु संकिपा नं म्हितलसा “मतिनाया कलि” संकिपाय् भिन्तुना जोशीलिसे हिरो जुया म्हितलसा थौंकन्हे “रश्मी” संकिपाय् आशिष्मा नकःमिलिसे हिरो जुया म्हिताच्वंगु दु ।
छम्ह बांलाःम्ह प्याखँ च्वमि व म्येच्वमिया रुपय् नं थःगु न्हाय् धस्वाके धुंकूम्ह सुरज व्यञ्जनकारया निचाः म्येचा “सुलाकासा” व “लिथ्वःगु मतिना” नं पिहाँ वयेधुंकूगु दुसाः “गुलि स्वय् खालिगु सलिचा”, “माया रे रत्न”, सपना श्रीया “म्वाःलि पुया काःवा याकनं दाइचा” या नापनापं आपालं म्युजिक भिडियोस मोडल जुया नं म्हिते धुंकल ।
न्ह्याम्हलिसें नं याउँक हे मिलेजुइफुम्ह सुरज व्यञ्जनकारं नेवाः संकिपा ख्यःया आपालं संकिपामिपिंलिसें ज्याः याना वया च्वंगु दु । थौंकन्हे थथे संकिपाया अभिनय ख्यलय् अतिकं हे व्यस्त जुयाच्वंम्ह सुरज व्यञ्जनकार थःगु कलायात्रा धाःसा वि.सं.२०४७ सालय् “अन्याय” नांयागु प्याखँ च्वया शुरु याःगु खः ।
व धुंका थःपिं नेपाल कमर्श कलेजय् ब्वना च्वंगु इलय् अनया स्वनिगः साहित्य पालाःपाखें आपालं प्याखँ, हुला प्याखँ व थीथी साहित्यिक साँस्कृतिक गतिविधिइ ब्वति काःगु खःसा थःम्हेसिनं उगु इलय् छिनागु पलाःया लिच्वः हे आः वया संकिपा ख्यःया कलाकारया रुपय् न्ह्याः वनेफूगु खँ सुरज व्यञ्जनकारं लसतां न्ह्यथन ।
Categorized in कला