nepal life

नेवाः वस्ती नेवाः एफ एम अभियान तःजिक न्ह्यात

नेवा: अनलाइन न्युज – ललेन्द्र शाक्य | २०७४ कार्तिक २६, आइतबार १०:५४:२९

नेवाः वस्ती नेवाः एफएम प्रतिभा अभियान वंगु शनिवाःनिसें न्ह्याःगु दु । नेवाः एफ एम १०६ फुति ६ मेगाहर्जया संयोजनय् नेवाःतय्गु वस्ती–वस्तीइ वना अनया नेवाःतय्गु प्रतिभा न्ह्यब्वयेगु नापं स्थानीय समस्यानिसें ऐतिहासिक नापं सांस्कृतिक व थीथी पक्षयात विश्वय् थ्यंकेगु आज्जु तया उगु कथंया अभियान न्ह्याकूगु खः । स्वनिगलय् न्हापांखुसि मानव वस्ती जूगु लागा कथं नालातःगु थक्वातं हे उगु अभियान न्ह्याकूगु खः ।

थक्वाःया ऐतिहासिक लागा झ्यालं फल्चाय् शनिवाः स्थानीयवासीया व्यापक सहभागीताय् जूगु उगु समारोहया ग्वसाःखलः हलिं नेवाः गुथि थक्वाः कचा, हलिं नेवाः गुथि थानकोट कचा, हलिं नेवाः गुथि सोनितपुर कचा व श्री आदिनारायण भजन मण्डलया मंकाः ग्वसालय् जूगु खः ।

उगु समारोहया सभानायः हलिं नेवाः गुथि थक्वाः कचाया नायः महेश्वर श्रेष्ठ जुयादीगु खः ।

ज्याझ्वलय् नेवाः एफएमया प्रवन्ध निर्देशकलिसें नेवाः पत्रकार राष्ट्रिय दबूया केन्द्रीय नायः श्रीकृष्ण महर्जनं नेवाः वस्ती नेवाः एफएम प्रतिभा अभियानया अवधारणा कनादीगु खः । वय्कलं नेवाःतय्गु सः विश्वन्यंकं थ्यंकेगु, नेवाःतय्गु वस्ती–वस्तीया समस्यायात न्ह्यब्वयेगु, स्थानीय नेवाःतय्गु प्रतिभा न्ह्यब्वयेगु कथं थुगु अभियान न्ह्याकागु खः धयादिल ।

महर्जनं लय् लय् पतिकं दकले लिपांगु शनिवाः थीथी नेवाः वस्तीइ वना नेवाः एफ एमपाखें प्रत्यक्ष प्रशारण याना थुगु अभियान न्ह्याकेगु जुइ धयादिल । वय्कलं नेवाः एफएमया लभधबाm।अयm।लउ पाखें विश्वन्यंकं हे नेवाःतय्गु वस्तीया सः थ्वयेकेगु अभियानया रुपय् न्ह्याकागु खः धयादिल ।

ज्याझ्वलय् मूपाहाँ हलिं नेवाः गुथिया केन्द्रीय नायः शान्तप्रकाश श्रेष्ठं थक्वाः धइगु किरातकालीन वस्ती खः धयादिसें थक्वाःया यक्व हे ऐतिहासिक सम्पदात न्हना वनेधुंकूगु दु धयादिल । वय्कलं नेवाः वस्ती वस्तीइ वना अनया सः थ्वयेकेगु अभियान गुगु कथं न्ह्याकल थ्व तसकं लसताया खँ खः धयादिसें थक्वाःया नितिं आः थक्वाःवासीत हे छप्पं छधी जुया वनेमाः धकाः बः बियादिल ।

ज्याझवलय् स्थानीयवासी नापं श्री आदिनारायण भजन मण्डलया प्रतिनिधि नापं बरिष्ठ संगीतकार धनबहादुर गोपालीं लसकुस न्वचू बियादीगु खः ।

अथेहे हलिं नेवाः गुथि थानकोट कचाया नायः विष्णुभक्त गोपाली, हलिं नेवाः गुथि सोनितपुर कचाया नायः ईश्वर श्रेष्ठ व श्री आदिनारायण भजन मण्डलपाखें इन्द्रबहादुर श्रेष्ठं थःथःगु नुगःखँ तयादीगु खः । 

ज्याझ्वलय् थक्वाःया साहित्यकारपिन्सं थःथःगु साहित्य रचना पाठ यानादीगु खःसा अथेहे थक्वाःया कालाकारपिन्सं म्ये हाला न्ह्याइपुकादीगु खः । पुलांगु पुस्तांनिसें न्हूगु पुस्तायापिं नं सहभागी जुयादीगु उगु ज्याझ्वलय् ब्यापकरुपं स्थानीयवासीत सहभागी जुयादीगु खः ।

शनिवाः ऐतिहासिक नेवाः वस्ती थक्वातय् तःजिक जूगु नेवाः वस्ती नेवाः एफएम प्रतिभा अभियानय् थक्वाःया ओमप्रकाश श्रेष्ठ, श्याम बहादुर श्रेष्ठ, शान्ति श्रेष्ठ, शिवप्रसाद श्रेष्ठ व भिमनारायण श्रेष्ठं थःथःगु चिनाखँ न्यंकादीगु खः ।

विनिता महर्जन व विनिता श्रेष्ठं न्ह्याकादीगु उगु ज्याझ्वलय् थक्वाःया कलाकारपिं कल्पना श्रेष्ठ, रामकेशरी गोपाली, भिंमबहादुर गोपाली, रोज गोपाली, श्रेना महर्जन, लक्ष्यता श्रेष्ठ व राज गोपालीपिन्सं सांगितिक ब्वज्या यानादीगु खः । थुगु कथंया अभियान आः मदिक्क न्ह्याका वनेगु जुइ धकाः नेवाः एफएमं धाःगु दु ।

Categorized in नेवाः