nepal life

नेप्लिज स्पोर्टस् ग्रुपयात यूएईया सर्वाधिक राशिया फुटबल उपाधि

नेवा: अनलाइन न्युज | २०७४ फाल्गुण २, बुधबार १७:४१:२६

यूनाइटेड अरब इमिरेट्स (यूएई)इ नेपाली समुदायया सर्वाधिक सिरपाः राशिया फुटबल कासा क्वचाःगु दु ।

रस अल खैमहय् क्वचाःगु उगु फुटबल कासाय् नेप्लिज स्पोर्टस् ग्रुप रस अलखेमां ४ हजार दिराम अर्थात् थ्यंमथ्यं १ लख १२ हजार तका दांलिसें विजय हासिल याःगु खः ।

फेब्रुअरी ९ तारिख शुक्रवाः क्वचाःगु उगु कासाया फाइनल म्याचय् नेप्लिज कम्युनिटी दुबईयात ट्राईबेकरय् २ या विरुद्ध १ गोलं पराजित यासें स्पोर्टस् ग्रुप रस अल खैमहं उपाधि त्याकूगु खः ।

यूएईस च्वंगु रस अलखेय् सरकारया फुटबल ग्राउण्डय् क्वचाःगु उगु कासाय् विजेता टीमं ४ हजार दिराम (१ लख १२ हजार तका) नगद व उपविजेता टीमं २ हजार दिराम (५६ हजार तका) नगदलिसें कप, मेडल व दसिपौ त्याकूगु खः ।

यूएईस क्वचाःगु उगु कासा आःतकया दुने दकले तःधंगु धनराशी जूगु कासा खः । उगु कासाय् यूएई न्यंकंया ८ गू नेपाली क्लबतसें धेंधेंबल्ला याःगु खः ।

कासाया फाइनल कासाय् विनोद श्रेष्ठ म्यान अफ दि म्याच घोषित जूगु खः । फेयर प्ले टिम अवार्ड युनाईटेड स्टार क्लब दुबई नं काःगु खः ।

अथेहे, उत्कृष्ट गोलकिपर राजु खुजाम घोषित जूगु खःसा दकले अप्वः गोल याःम्ह अरुण घिसिङ पुरस्कृत जूगु खः । वं कासा ज्वःछि ४ गोल याःगु खः । फुटबल कासाया दकले उत्कृष्ट कासामि स्वीकार राई घोषित जूगु खः ।

एनआरएन आईसीसी दुजः सुदीप कार्की, एनसीसी दुजः रेशम लामा, आरसीसी दुजः जनार्दन सुवेदी, ईनास मूछ्याञ्जे राम तामाङ लिसें सर्वसाधारण नेपाली कामदारपिनिगु लिसेंया ज्याझ्वलय् उपस्थिति दूगु खः ।

नेप्लिज स्पोर्टस् ग्रुपया नायः किशोर शाक्यं कासां युएईस च्वंपिं नेपाःमिपिं दथुइ सदभाव व भाइचार स्वापू अप्वयेकीगु विश्वास प्वंकादीगु दु ।

Categorized in कासा