नेवा: अनलाइन न्युज | २०७४ माघ २, मंगलबार १७:०९:४७

नेपाली कांग्रेसय् मेगु युवा नेतातय्गु पुचः खनेदूगु दु । युवा नेतातय्गु मेगु पुचलं पार्टीयात सशक्त दयेकेत धासें वैचारिक जागरण अभियान न्ह्याकेत माग याःगु दु ।

७ गूलिं प्रदेशया १० म्ह युवा नेतातसें मंकाः वक्तव्य पिथनाः पार्टी नेतृत्वयात शुद्धिकरण व सुदृढीकरण यायेत जागरण अभियान न्ह्याकेत माग याःगु खः ।

युवा नेतातय्गु न्हूगु पुचलं पार्टीया आमूल रुपान्तरणया नितिं धासें १५ गू बुँदे सुझावलिसेंया विचाः न्ह्यःने हःगु दु ।

युवा नेतातसें भातृत्वया विकास यानाः गुटबन्दी अन्त्य यायेमाःगु, गाउँ तहतक सिद्धान्त व एजेन्डाय् आधारित वैचारिक जागरण अभियान न्ह्याकेमाःगु , निर्वाचनया गम्भीर समीक्षा यायेमाःगु माग याःगु दु ।

नियमित महासमिति बैठक जुइगु सुनिश्चितता, निर्वाचन परिणामया जिम्मा मू नेतृत्वं जक मजूसे केन्द्रीय समितिं हे कायेमाःगु, समानुपातिकपाखें छक्वः सांसद जूपिं व्यक्तियात छुं नं हालतय् दोहोरे यायेमज्यूगु, पार्टीयात व्यवस्थित, पशिक्षित व संगठित यानाः हरेक गाउँतहतक प्रशिक्षण अभियान न्ह्याकेमाःगु माग इमिगु खः ।

वक्तव्यय् पार्टी पार्टीया हरेक तहलय् कम्ती नं ५० प्रतिशत युवा प्रतिनिधित्वया ग्यारेन्टी यायेमाःगु, विपीया लँपुइ वनेमाःगु, व्यक्तिवादी चरित्र व अनुशासनहीनताया अन्त्य यायेमाःगु, भ्रष्टाचार मुक्त नेपाल, सुशासनयुक्त नेपाल, अभियान संचालन यायेमाःगु, तत्काल पार्टी पदाधिकारी, विभाग, प्रदेश समिति व भातृ संस्थातय्त पूर्णता बियाः संगठन निर्माण यायेमाःगु न्ह्यथनातःगु दु ।

दँय् दसं पारदर्शी रुपं क्रियाशील सदस्यता वितरण यायेमाःगु, पार्टीया जिल्ला कार्यसमिति व केन्द्रीय कार्य समितिया आकार अप्वयेकेमाःगु व कांग्रेसया नेतृत्वय् ‘सुन्दर नेपाल समृद्ध नेपाल अभियान’ न्ह्याकेमाःगु सुझाव पुचलं ब्यूगु दु ।

उगु न्हूगु पुचलय् महासमिति दुजःपिं भुपेन्द्रजंग शाही (प्रदेश ६), धमेन्द्र नेम्वाङ (प्रदेश १), विनिता अधिकारी (प्रदेश ३), खडक डाँगी (प्रदेश ६), सुनिता अधिकारी (प्रदेश ५) दु ।

अथेहे, गुराँस गाउँपालिका नायः खेमराज वली (दैलेख), पहोरा नगरपालिकाया मेयर सेख वकिल (रौतहट), वाग्लुङया क्षेत्रीय सभापति चिरञ्जीवी गौतम, लमजुङया क्षेत्रीय सभापति वृषराज गुरुङ व बझाङया पूर्व महाधिवेशन प्रतिनिधि मञ्जित ताम्राकार दु ।

Categorized in राजनीति