nepal life

नेपालय् न्हापांखुसि मिडिया फेष्टिवलया नितिं जिल्ला जिल्लाय् सहलह मुँज्या

नेवा: अनलाइन न्युज – ललेन्द्र शाक्य | २०७४ मङ्सिर १०, आइतबार १०:५२:३८

देय् न्यंकंया नेवाः पत्रकारतय्गु राष्ट्रिय संगठ नेवाः पत्रकार राष्ट्रिय दबूपाखें नेपालय् हे न्हापांखुसि मिडिया फेष्टिबल यायेगु नितिं थीथी जिल्ला सहलह मुँज्या न्ह्याकूगु दु । वइगु नेपाल संवत ११३८ पोहेलागा पञ्चमी पुष २२ गते शनिवाः कुन्हु लाका अथे फेष्टिबल यायेत्यंगु खः ।

शनिवाः काभ्रे जिल्लाय् वना जिल्ला कचाया पदाधिकारी नापं स्थानीय क्रियाशिल नेवाः पत्रकारतलिसे उगु फेष्टिबलया बारे सहलह ब्याकेगु ज्या याःगु दु । दबूया केन्द्रीय नायः श्रीकृष्ण महर्जन, न्वकू, सुरजवीर बज्राचार्य, दांभरी सुरेन्द्रभक्त श्रेष्ठ व ख्वप जिल्लाया नायः इश्वरकाजि खाइजु तकं सहभागी जुयादीगु खः ।

उगु कथंया जिल्ला जिल्लाय् मिडिया फेष्टिबलया बारे सहलह ब्याकेगु झ्वलय् वइगु मंगलवाः येँ जिल्ला कचाया मुँज्या च्वनेत्यंगु अले उगु मुँज्याय् नं केन्द्रीय नेतृत्व सहभागी जुइ धाःगु दु ।

समावेशी संचारया नितिं मिडिया फेष्टिबल ज्याझ्वः यायेगु नितिं तयारी सुरु जुइ धुंकूगु दु धकाः दबुलिं धाःगु दु । नेपालय् समावेशी संचारया बारे बहस जुयाच्वंगु अवस्थाय् बास्तवय् नेवाः पत्रकार राष्ट्रिय दबूपाखें सशक्त कथं समावेशी संचारया बारे भूमिका म्हितेगु नितिं नं उगु कथंया ज्याझ्वः याये त्यनागु खः धाःगु दु ।

नेपाल पत्रकार महासंघया संस्थापक नायः सत्यनारायण बहादुर श्रेष्ठया मुद्दा, नेपाःया न्हापांम्ह मातृभाषाया पत्रकार धर्मादित्य धर्माचार्यया मुद्दायात तकं स्थापित याकेगु अले सरोकारवाला पक्षयात स्वीकार याके बिइगु कथंया अथे मिडिया फेष्टिबल याये त्यनागु खः धकाः दबुलिं धाःगु दु ।

नेवाः भासं पिहां वयाच्वंगु पत्रपत्रिका, नेवाः भासं ज्याझ्वः संचालन जुयाच्वंगु एफ एम, टेलिभिजननिसें अनलाईन तकया नं स्टल तयेगु नापनापं थीथी मातृभाषाया संचार संस्था व खय् भायया संचार संस्थाया तकं सितिकं स्टल तयेके बिइगु कथंया व्यवस्था सहितया अथे मिडिया फेष्टिबल यायेत्यंगु खः ।

संचारकःमित म्हसीकेगु, थीथी प्रकाश गृहया प्रकाशया बारे स्वयेगु, पत्रिकापाखें ग्रहाक दयेकेगु, संचार माध्यमया प्रचार प्रशार यायेगु, सरकारी निकायनिसें थीथी निकायया प्रतिनिधि, संचारकःमिनिसें थीथी राजनीतिक दलया नेता व जनप्रतिनिधित तकं दुथ्याका अथे समावेशी संचारया नितिं मिडिया फेष्टिबल यायेत्यंगु खः ।

मिडिया फेष्टिबलय् नेवाः पत्रकार राष्ट्रिय दबूया येँ, यल, ख्वप, काभ्रे, दोल्खा, गोरखानिसें थीथी कचाया नाप नापं केन्द्रया पदाधिकारी नापं दुजःपिं सक्रिय जुइ धाःगु दु । विशेष याना नेवाः पत्रकारत दुथ्यानाच्वंगु फुक्क संचार माध्यमया प्रकाशननिसें म्हसीका पिब्वइगु कथंया सामग्री सहित ज्वना स्टल तयेगु ज्या याइ धकाः नं धाःगु दु ।

थुगु फेष्टिबल नेवाः पत्रकारतय्गु छगू कथंया महत्वपूर्ण पलाः जुइ धाःगु दुसा संचार ख्यःयापिनिगु नितिं आःतक गबलें मजूनिगु कथंया महोत्सवया रुपय् न्ह्यब्वयेगु जुइ धकाः नं धाःगु दु । फेष्टिबलय् समावेशी संचारया सवालयात कया थीथी स्टरया छलफल यायेगु औपचारिकनिसें अनौपचारिक ज्याझ्वः तकं यायेगु जुइ धकाः नं दबुलिं जानकारी बिउगु दु ।

नेपालभाषा पत्रकारिताया इतिहासंनिसें वर्तमान तकया पत्रिकात नं दबूपाखें हे स्टलय् दुथ्याकेगु कथंया कुतः याना च्वनागु दु धकाः ग्वसाः खलकं जानकारी बिउगु दु ।

Categorized in नेवाः