nepal investment baink

नेपालभाषा केन्द्रीय विभाग प्रमुखया बिदाइ ज्याझ्वः

नेवा: अनलाइन न्युज – राकेश महर्जन | २०७४ आश्विन १, आइतबार १५:४३:०६

नेपालभाषा केन्द्रीय विभागय् झिंस्वला न्ह्यः विभागीय प्रमुख जुयादीम्ह प्राडा चन्द्रमान बज्राचार्यया कार्यकाल क्वचाःगुयात कयाः विभागय् अध्ययनरत ब्वँमिपिंसं वय्कःया सम्मानय् छगू विदाइ ज्याझ्वः याःगु दु ।

केन्द्रीय विभागय् थौं आइतवाः सुथय् जूगु बिदाइ ज्याझ्वलय् प्राडा चन्द्रमान बज्राचार्ययात ब्वँमिपिंपाखें सम्मान यासें लुमन्ति चिं लःल्हाःगु खःसा वय्कःया कार्यकाल लिपाया जीवनया सफलताया कामना नं याःगु खः ।

सम्मानलिपा नुगःखँ तयेगु झ्वलय् बज्राचार्यं विभागीय प्रमुख जुयाः वयेन्ह्यः दयाच्वंगु अस्तव्यस्ता थम्हं चीकागु, थःगु हे कार्यकालय् सेमेष्टर प्रणाली लागू जूगु व उकिया निंतिं तयार मजूगु कोर्स दयेके ज्या न्ह्याकागु आदि ज्याखँ बारे कनादिसें ज्या याये अझं ल्यं दनीगु व थुकथं ज्याया दथुइ कार्यकाल क्वचायेकाः वनेमाःगु खँय् नुगः नं मछिंकादिल । लिसें पारिवारिक माहौलय् च्वनाः विभागीय प्रमुख जुइखंगु थःगु कार्यकालयात सुथां लाकेया निंतिं ग्वाहालि यानादीपिं सकल शुभेच्छुकपिंत सुभाय् नं देछानादिल ।

एम.एम. न्हापांगु सेमेष्टरया विद्यार्थी हरिशंकर मानन्धरजुया सभानायःसुइ जूगु ज्याझ्वलय् विद्यार्थीपिं किरण केन रंजित व दर्शनवीर शाक्यपिंसं विद्यार्थीपिनि मिखाय् विभाग प्रमुख व शिक्षक कथं प्रा.डा. चन्द्रमान बज्राचार्ययात कयाः नुगःखँ तयादीगु खः । वय्कःपिंसं  विभागीय प्रमुखया नातां बज्राचार्यं विद्यार्थीपिंत यानादीगु ग्वाहालि, गुण व ज्याखँया बारे चर्चा यानादिसें वय्कःया कार्यकाल स्मरणीय जूगु न्ह्यथनादिल ।



अथेहे, नुगःखँ तयेगु झ्वलय् विभागया शिक्षक उपप्रा. बज्रमुनि बज्राचार्यं पुलांम्ह वनेधुंकाः आः न्हूम्ह विभागीय प्रमुख वयेमफुगु खँय् दुःख प्वंकादिसें थुगु केन्द्रीय विभाग नं नेवाः देय् दबू, नेपालभाषा एकेदमि थें हे नेवाःतय् छगू राष्ट्रिय स्तरया संस्था जूसां नेवाः खलःपुचःतय्सं उकथं कयामच्वंगु खँय् दुःख तायेकादिल ।

अथेहे, विभागया मेम्ह शिक्षक सहप्रा. ओमकारेश्वर श्रेष्ठं नं नुगःखँ तयेगु झ्वलय् विभागीय प्रमुखया कार्यकाल क्वचायेधुंकाः विद्यार्थीपिंत थुकिं लाइगु लिच्वःबारे इलय् हे सहलह यानाः न्ह्याःवनेमाःगु विचाः प्वंकादिल ।



विभागय् अध्ययनरत विद्यार्थीपिंबाहेक पुलांपिं विद्यार्थी, विभागया गुरुवर्गपिनि सहभागिता दुगु ज्याझ्वःयात ब्वँमिपिं केशरी प्रधानजुं न्ह्याकादीगु खःसा राकेश महर्जनं लसकुस यानादीगु खः ।

Categorized in नेवाः