नेपालभाषाया साहित्यकार नाती महर्जन मन्त
नेवा: अनलाइन न्युज | २०७४ पौष २८, शुक्रबार १८:४८:३१
किपू नगरपालिकाया पांगा याम्ह नेपालभाषा क्षेत्रया बहुमुखी प्रतिभाया तःमिम्ह प्याखं, म्ये, कविता च्वज्याय् न्ह्यःने लाःम्ह कवि नाती महर्जन पौष २७ गते बिहिवाः आकाझाकां मन्त ।
नेपालभाषा साहित्य क्षेत्रय् नाती ‘पाकः’ उपनामं म्हस्यू ।
वय्कलं समाजय् घटे जुगु यर्थाथ घटनायात मार्मिक ढंगं च्वसापाखें न्ह्यब्वयादीफुम्ह साहित्यकार खः । सकललिसे मिले चले जुइसःम्ह खः नाती महर्जन ।
सुगर, ब्लड प्रेसरं पीडित साहित्यकार नाती महर्जन पौष २७ गते सनिलय् म्हमफुया कीर्तिपुर अस्पतालय् थःहे वनाः वासः याःझाःम्ह खः । अस्पतालय् पलखः जाँच याःबले छुं हे म्वाःम्ह छेँय् तुं झाःगु खः ।
अय्सां छेँजःपिन्त चित बुझय् मजुया मोडेल अस्पतालय् भर्ना यायेखतंं पौष २७ गते बिहिवाः करिब सुथं न्हापा ६ः१५ ता इलय् मोडेल अस्पतालय् मदुगु पारिवारिक स्रोतं जानकारी ब्यूगु खः ।
पांगा देउख्यलय् जन्म जुया द्यःचपा सालिकय् च्वना वयाच्वंम्ह कवि धर्मराज महर्जन व ज्ञानथकु कोखं थौंसिबें ७४ दँ अर्थात वि.स. २००० बैशाख महिनाय् जन्म जुयादीम्ह किपूया पांगाय् स्वम्ह सन्तान मध्ये तःधिकम्ह काय्या रुपय् जन्म जुयादीगु खः ।
वय्कःया स्वम्ह काय्पिं दु । वि.सं. २०१६÷१७ सालंनिसें साहित्यिक क्षेत्रय् पला तयादीम्ह तात्कालिन इलय् नाटकत, सापारुया इलय् नाटक, ख्यालया निर्देशन तकं याइगु ज्या यानादीम्ह खः ।
करिब २ बर्ष न्ह्यः जक नेपालभाषाया “ई ब्यया चिनाख” सङ्ग्रहीत कविता प्रकाशित जूगु खः नाती महर्जनया ।
किपूया स्थानीय पत्रपत्रिकाय् आपालं चिनाखँत प्रकाशित जुगु दु वय्कःया । वय्कःया थौंकन्हय् नेपालभाषाया कृति ‘गरिबतय्गु नखः मोहनि नखः’ कृति प्रकाशित जुइ ल्यं दनिगु कृति खः । लिसें चिनाखँ, बाखँ व गीति सङ्ग्रहत प्रकाशित यायेगु वय्कःया योजना दुगु खः ।
–रीदेन महर्जन
Categorized in नेवाः