nepal life

नेपालभाषाया नक्सांकनया विषयस वर्कशप

नेवा: अनलाइन न्युज – विजयरत्न असंबरे | २०७४ पौष २७, बिहिबार १८:१७:५२

संसारय् म्वानाच्वंगु न्ह्याग्गु नं भाषाया छगू थःगु हे लागा दइ । अले व भासं न्वःवाइगु लागाया छगू नक्सा दइ धैगु खँयात दुवालाः नेपालभाषाया नक्सांकनयात कयाः बुधवाः छगू तःजिगु वर्कशप जूगु दु ।

वर्ल्ड एजुकेशनया सपोर्टय् समुन्नत नेपालया ग्वसालय् जूगु उगु वर्कशप ज्याझ्वलय् स्वनिगः दुने येँ व यल लिसें ख्वपय् न्वःवाइगु नेवाः भासाया नापनापं दोलखा, रामेछापनिसें कयाः यल दुनेया हे प्याङगामय् न्वःवाइगु भाय् नं नेवाः भाय् हे खः धइगु खँया चर्चा जूगु खःसा येँ व यल दुने न्वःवाइगु नेवाः भाय् आपालं ज्वःलाःगु खँ पिहाँ वःगु खः ।

समुन्नत नेपालया कार्यकारी निर्देशक योगेश श्रेष्ठं थःगु नुगःखँ तयाः न्ह्याकादीगु खःसा वर्कशपय् सीमा आचार्यं वर्कशप न्ह्याकादीगु खः ।

संचार माध्यमया विकासय् आः इन्टरनेट नेटवर्क छगू मजिमगाःगु अंग जुइधुंकूगु व मचातय्त नेवाः भासं ब्वंकेत इन्टरनेटया लिधंसा मकाःसे मगाःगुलिं मचातय्त ल्वय्क थीथी हलंज्वलं इन्टरनेटय् तयेत गुगु नेवाः भाय् छ्यलेगु धैगु खँयात कयाः उगु वर्कशप जूगु खः ।

उगु वर्कशपय् नेवाः वस्ती नेवाः स्कूल अभियानया अभियन्तापिं दीपक तुलाधर, नवीन थेच्वमि, रमिता बज्राचार्य, रेणुका बज्राचार्य, लसता सिंहया लिसेलिसें मचा साहित्य व नेवाः साहित्यय् पलाः न्ह्याकाः च्वंपिं बंशीधर बज्राचार्य, विष्णु चित्रकार, राजितबहादुर श्रेष्ठ, दर्शनवीर शाक्य, राजनलाल जोशी (रास जोशी), मीना बज्राचार्य आदिपिन्सं ब्वति कयादीगु खः ।

Categorized in नेवाः