nepal life

नेपालं मलेसियायात नं बुकल

नेवा: अनलाइन न्युज | २०७४ कार्तिक २८, मंगलबार १४:४४:४१

एसीसी यू–१९ एसिया कप क्रिकेटया समूह चरणय् नेपालं घरेलु पुचः मलेसियाय् ८ विकेटया शानदार जित हासिल याःगु दु ।

मलेसियां ब्यूगु ४६ रनया लक्ष्य नेपालं २ विकेट गुमेयानाः ५.३ ओभरय् पूवंकूगु खः ।

ओपनर आशिफ शेख ४ रनया व्यक्तिगत स्कोरय् आउट जुइधुंकाः वःम्ह कप्तान दिपेन्द्र सिंह ऐरीं मद्दिक्क २ छक्का प्रहार यानाः आउट जूगु खः । मेम्ह ओपनर अनिल साह नं २६ व प्यंगूगु ल्याखय् वःम्ह भीम सार्कीं अविजित २ रन प्रहार यानाः नेपाःयात ८ विकेटया जित ब्यूगु खः । साह नं छक्का प्रहार यानाः नेपाःयात त्याकूगु खः ।

बलिङपाखे मलेसियाया विजय उन्नीं २ विकेट काःगु खः । थ्वसिबें न्ह्यः बायुमास ओभलय् टस बुकाः न्हापां ब्याटिङ याःगु घरेलु पुचः मलेसियां १५.३ ओभरय् फुक्क विकेट गुमेयानाः ४५ रन दयेकूगु खः ।

वा वःगु हुनिं डकवर्थ लेविस नियम कथं २४ ओभरय् क्वाहाँ वःगु कासाय् नेपाःया सशक्त बलिङ आक्रमणया न्ह्यःने मलेसिया निरिह जूगु खः ।

घरेलु पुचः मलेसियायात अःपुक्क हे बुकेगु झ्वलय् नेपाःया नितिं सन्दीप लामिछानें ५, कप्तान दिपेन्द्र सिंह ऐरी व साहव आलमं २–२ व अनिलकुमार साह नं १ विकेट काःगु खः ।

सुरुवातनिसें हे आक्रामक बलिङ याःगु नेपालं मलेसियाया सुं नं ब्याट्सम्यानयात ताःहाकःगु ईतक क्रिजय् तयेके मब्यूगु खः । ओपनर सायद अजिजं २० व जगजीत सिंहं १० रन दयेकूगु बाहेक मलेसियाया मेपिं ब्याट्सम्यानं ज्वःगु बलिङया सामना याये हे मफुत ।

खुक्वःगु ओभरया प्यक्वःगु बलय् जगजितयात अनिल साह नं जितेन्द्र सिंहया ल्हाःपाखें क्याचआउट याकेधुंकाः न्ह्याःगु मलेसियाया विकेट पतन जुइगु लँपुइ न्ह्याःगु खः ।

५.४ ओभरय् ३३ रन दयेकूगु मलेसियां वधुंकाः १२ रन मुंकाः थःगु फुक्क विकेट गुमेयात ।

थ्वसिबें न्ह्यः समूहया निगूगु कासाय् भारतविरुद्ध ऐतिहासिक १९ रनया जित पिकाःगु नेपाः न्हापांगु कासाय् बंगलादेशलिसे २ विकेटं बूगु खः ।

थ्वसिबें न्ह्यः नेपालं न्हापांगुखुसि भारतयात नं बुकूगु खः ।

Categorized in कासा