nepal life

नेपाःया न्हापांगुखुसि इतिहास ः सेमिफाइनलय् अफगानिस्तानलिसे म्हितीगु

नेवा: अनलाइन न्युज | २०७४ कार्तिक ३०, बिहिबार १६:४८:२७

एसीसी यू–१९ युथ एसिया कप क्रिकेट कासाया सेमिफाइनल कासाय् न्हापांगुखुसि थ्यंगु नेपालं शुक्रवाः अफगानिस्तानया सामना याइगु जूगु दु ।

मलेसियाया किनररा ओभल मैदानय् जुइगु कासाय् नेपालं विजय लक्ष्यया लिसें अफगानिस्तानया सामना याइगु जूगु दु ।

निगुलिं पुचलं आःतक युथ एसिया कपया फाइनल थ्यंके मफूगु खःसा थुगुसी निगू पुचःमध्ये छगू पुचः फाइनलय् थ्यनीगु जूगु दु ।

उकिं नं निगुलिं पुचः न्हूगु इतिहास निर्माण यायेगु दाउलय् वंगु दु । समूह ‘ए’स लाःगु बंगलादेशं वहे पुचःया भारतयात ८ विकेटं बुकेधुंकाः नेपाल समूहया उपविजेता जुसें कासाया सेमिफाइनलय् दुहाँ वंगु खः ।

समूह चरणया कासाय् स्वंगू कासा म्हितूगु नेपालं निगू कासाय् जित व छगू कासाय् हार बेहोरे याःगु खः । नेपालं बंगलादेशलिसेया न्हापांगु कासाय् निगू विकेटं बूगु खःसा भारतयात १९ रन व ग्वसाः खलः मलेसियायात ८ विकेटं बुकूगु खः ।

यू–१९ उमेर समूहया एसिया कपय् स्वक्वःतक च्याम्पियन जूम्ह भारत मद्दिक्क निगू कासाय् पराजित जुसें थ्वसिबें न्ह्यः हे कासापाखें पिहाँ वनेधुंकूगु दुसा ग्वसाः खलः मलेसिया नं कासापाखें पिहाँ वनधुंकूगु दु ।

अथेहे, समूह ‘बी’ स लाःगु पाकिस्तान व अफगानिस्तानं सेमिफाइनलया यात्रा तय याःसां नं श्रीलंका व संयुक्त अरब इमिरेट्स (युएई) कासां पिहाँ वंगु खः ।

Categorized in कासा