नेपाःया गौरव ननिता व रुजेशयात किपूया तःननी त्वालय् तःजिक हनीगु
नेवा: अनलाइन न्युज – ललेन्द्र शाक्य | २०७४ आश्विन २६, बिहिबार ११:२४:४१
लाईभ कन्सर्ट व थीथी मनोरञ्जनात्मक सांगितिक ज्याझ्वः
मंगोलियाय् छुं दिं न्ह्यः जक जुयाः क्वचाःगु ९ क्वःगु वर्ल्ड बडिबिल्डिङ च्याम्पियनसिप २०१७ स फष्ट रनरअप जुइत ताःलाःम्ह नेपाःया ननिता महर्जन व सेकेण्ड रनरअप जुइत ताःलाःम्ह रुजेश शाहीपिन्त सम्मान यायेगु ज्याझ्वः तयातःगु दु ।
किपू नगरपालिका १० वडाय् च्वंगु तःननी दाफा खलःया ग्वसालय् तःननी त्वालय् हे जुइगु उगु सम्मान ज्याझ्वः सनिलया ५ ता इलंनिसें न्ह्याइगु जानकारी ग्वसाः खलकं ब्यूगु दु ।
वय्कःपिनिगु सम्मान ज्याझ्वःया लिसें लाईभ म्यूजिक कन्सर्ट, हुलाप्याखं लिसें थीथी मनोरञ्जनात्मक ज्याझ्वः नं तयातःगु दु । लिसें ज्याझ्वलय् ननिता व रुजेशपिन्सं मंगोलियाय् ब्वज्या याःगु कासाया फुटेज नं प्रोजेक्टरपाखें क्यनीगु ग्वसाः ग्वयातःगु दु ।
थौंकन्हय् ननिता च्वनाच्वंगु किपू नपा १० वडा न्हूबजारय् च्वंगु छेँय् निसें बाजागाजालिसें जात्रा यानाः किपू नगर चाःहिकेगु ज्याझ्वः थौं बिहिवाः न्हिनय् ३ ता इलय् जुइगु व सनिलया ५ ता इलय् तःननी त्वालय् थ्यंकाः मञ्चय् आसन ग्रहण याकाः सम्मान यायेगु ज्याझ्वः दूगु जानकारी ग्वसाः खलकं ब्यूगु दु ।
९ क्वःगु डब्ल्यूबीपीएफ वर्ल्ड बडिबिल्डिङ एण्ड फिटनेश च्याम्पियनसिप २०१७ स ननितां १६५ सेमी हाइटय् म्हितादीगु खःसा रुजेश शाही ६० केजी तौल समूहपाखें म्हितादीगु खः ।
मंगोलियाय् जूगु उगु कासाय् टीम म्यानेजर जुयाः दिनेश राजभण्डारी झायादीगु खः ।
थौं बिहिवाः नेपाःया गौरव ननिता व रुजेशयात सम्मान याइगु थाय् किपू नपा १० वडा तःननी त्वाः ननिता महर्जन जन्म जूगु त्वाः खः ।
थौं बिहिवाः जुइगु सम्मान व लाइभ कन्सर्ट ज्याझ्वलय् सकलसित सहभागिताया नितिं ग्वसाः खलः तःननी दाफा खलकं इनाप याःगु दु ।
Categorized in कासा
