nepal life

निष्ठानन्द बज्राचार्य (लोककवि राजभाई जकःमिया चिनाखँ)

लोककवि राजभाइ जकःमि


गद्यगुरु निष्ठानन्द ॐबाः त्वालय् च्वंम्ह
बाखं ककं सकसितं जुरुमुरुं थंम्ह ।

थःगु कुल गुभाःजुया नित्य कर्म यानाः
वुद्धं ब्यूगु ज्ञान इनाः शान्तिया लँ ज्यानाः
जिवंकाःछि झीगु भायया दुख–सुख ब्वःम्ह
गद्य–गुरु निष्ठानन्द ॐबाः त्वालय् च्वंम्ह ।

दँ दँ बिकाः छापा आखः थःगु ल्हाःतंं दय्काः
प्रज्ञापारमिता वहे आखः जलं खय्काः
दके न्हापां सफू ज्यानाः न्हूगु युग हःम्ह
गद्य–गुरु निष्ठानन्द ॐबाः त्वालय् च्वंम्ह ।

‘खँ हे जक न्यायकाः मखु ज्यां हे थःत ब्वयमाः
शास्त्रभासं मखु च्वसु जनभासं च्वयमाः’
धाःम्ह जक मखु व ला ज्या हे यानाः क्यंम्ह
गद्य–गुरु निष्ठानन्द ॐबाः त्वालय् च्वंम्ह ।

थःत हे नं पिना ह्वःम्ह झीगु नुगः–स्वां व
समाज हे ल्ह्वना वंम्ह झीगु भायया थां व
ललितबिस्तर महा–ग्रन्थ च्वयाः वंम्ह
गद्य–गुरु निष्ठानन्द ॐबाः त्वालय् च्वंम्ह ।

(थुगु चिनाखँ थौं बुधवाः थिंलाथ्व चौथि ने.सं. ११३८ (मंसीर ६ गते) येँया ओमबहाः त्वालय् जूगु गद्यगुरु पं. निष्ठानन्द बज्राचार्यया १६१ क्वःगु बुदिं हने ज्याझ्वलय् लोककवि राजभाई जकःमिजुं वाचन यानादीगु चिनाखँ खः । –सं.)