nepal life

निर्माण व्यवसायी महासंघया नायः गौचनया न्याम्ह हत्यारापिं सार्वजनिक

नेवा: अनलाइन न्युज | २०७४ कार्तिक २९, बुधबार १२:२३:३०

निर्माण व्यवसायी महासंघया नायः शरदकुमार गौचनया हत्याय् दुथ्याःपिं न्याम्ह अपराधीपिन्त प्रहरीं गिरफ्तार याःगु दु ।

प्रहरीं मंगलवाः पत्रकार सम्मेलन यानाः वंगु असोज २३ गते गौचनयात बानेश्वर, प्रयागमार्गय् गोली क्ययेकूपिं नुवाकोट, पंचकन्या गाउँपालिका–५ या राजीव स्याङताङलिसें न्याम्हेसित गिरफ्तार यानाः सार्वजनिक याःगु खः ।

गिरफ्तारीइ लाःपिं पर्सा, कालिकामाई गाउँपालिकाया शिवजी महतो, भारत विहार बेतिया जिल्लाया मुकेशकुमार पाण्डे, पर्सा, ठोरी गाउँपालिकाया सन्तोष गुरुङ व येँ नागार्जुन नगरपालिकाया प्रकाश बुढाथोकी खः ।

महानगरीय प्रहरी ज्याकुथिया प्रमुख आयुक्त, अतिरिक्त प्रहरी महानिरीक्षक जयबहादुर चन्दं घटनाया मू योजनाकार समीरमान सिंह बस्नेत, मनोज पुनलिसें बोका धैम्हगंगा लिङ

देन (लिम्बु), श्यामबहादुर गुम्बे, लोप्साङ, कालेदाई धैम्ह अम्बरबहादुर राना, रोशन बुढाथोकी व अजय थापा यानाः च्याम्ह आःतक नं फरार जुयाच्वंगु जानकारी बियादिल ।

फरार जुयाच्वंपिं मध्ये रोशन बुढाथोकी व अजय थापा नेपाली सेनाया भगौडा सिपाही जूगु अनुसन्धानपाखें सीदूगु दु । अथेहे, गिरफ्तारीइ लाःीपं प्रकाश बुढाथोकी घटनाया योजनाकार समिरमान सिंह बस्नेतया थःथिति जूगु व वंहे नेपाः पिने च्वंम्ह बस्नेतया निर्देशनय् नेपाः दुने ज्या याःगु प्रहरीं जानकारी ब्यूगु दु ।

घटना जुइधुंकाः प्रहरीं नायब प्रहरीमहानिरीक्षक गणेश केसीया नेतृत्वय् ७ म्ह दुजःया अनुसन्धान पुचः नीस्वंगु खः । वहे पुचलं थीथी थासं इमित गिरफ्तार याःगु खः । उगु पुचलं गौचनलिसे रकम माग याःगु व कायेमखने धुंकाः हत्या याःगु प्रारम्भिक अनुसन्धानय सीदूगु नायब महानिरीक्षक केसीं जानकारी बियादिल ।

वय्कलं धयादी, “फुक्क निर्माण व्यवसायीपाखें एकमुष्ठ रकम मुंकाः बुझेयायेत तःक्वःमछि व्यवसायी गौचनयात दबाब ब्यूगु जुयाच्वन, गौचनं उगु ज्या याये माने मजूबलय् हत्या याःगु खनेदु ।”

गिरफ्तारीइलाःम्ह महतों हत्याय् छ्यःगु मोटरसाइकल भारतया बेतियापाखें १८,००० तका दां पुलाः हयाः सन्तोष गुरुङयात २४,००० तकां म्यूगु व हत्याया इलय् बा३५प २४६१ ल्याः तयाः छ्यःगु, शिबजी महतों भारतया हे बेतियापाखें ५५,००० तकां ल्वाभः न्यानाः ६५,००० तकां गुरुङयात म्यूगु अनुसन्धानया झ्वलय् सीदूगु प्रहरीं जानकारी ब्यूगु दु ।

घटनाय् निगः गोली प्रहार जूगु व निगलं गोली ब्यागलं ब्यागलं ल्वाभःपाखें प्रहार जूगु प्रहरीं जानकारी ब्यूगु दु । गोली प्रहार धुंकाः गौचनयात तत्काल सिभिल अस्पताल थ्यंकूसां नं चिकित्सकपिन्सं सीधुंकूगु घोषित याःगु खः ।

प्रहरीं फुक्क अभियुक्त ज्वने मफुनिगु व अनुसन्धान जुया हे च्वंगुलिं घटनालिसे सम्बन्धित फुक्क विषय अझ नं स्पष्ट मजूनिगु जानकारी ब्यूगु दु ।

Categorized in दुर्घटना-अपराध