नेवा: अनलाइन न्युज | २०७४ माघ ५, शुक्रबार १५:३८:३५

चीनय् जन्मदर म्हो जूगु बुखँ वःगु दु । चीन सरकारं अनया फुक्क दम्पत्तिपिन्त निम्ह सन्तान बुइकेगु अनुमति ब्यूगु जूसां नं जन्मदरय् धाःसा झन हे कमी वःगु बुखँय् जानकारी बियातःगु दु ।

चीनया राष्ट्रिय तथ्यांक विभागं ब्यूगु जानकारी कथं चीनय् वंगु दँ मुक्कं १ करोड ७२ लख मचात जन्म जूगु खः । तर उकिया न्हापांगु दँ अर्थात् सन् २०१६ य् धाःसा १ करोड ७९ लख मचात जन्म जूगु खः ।

चिनियाँ फुक्क दम्पत्तियात न्हापा निम्ह सन्तान बुइकेगु अनुमति मदु । चीनया छम्ह मचा नीतिइ अनया सरकारं सन् २०१५ स हिउपाः हःगु खः । वधुंकाः चीनया फुक्क दम्पत्तिं निम्ह सन्तान बुइके दइगु अधिकार काःगु खः ।

चीन सरकारं सन् १९७० या दशकनिसें हे छम्ह मचा नीति अख्तियार याःगु खः । उकी हिउपाः यानाः सन् २०१५ स फुक्क दम्पत्तिं मचा बुइके दइगु याःगु खः ।

थुगु नीति अख्तियार याःगु इलय् सन् २०१५ स चीन सरकारं चीनय् आः अप्वः मचा जन्म जुइफइगु व उकिं देसया जनसंख्या अप्वइगु अनुमान याःगु खः ।

तर सन् २०१७ या लिपांगु लिच्वः स्वयेबलय् धाःसा अथे जुइमफूगु खनेदूगु दु । उकिं अनया अधिकारीपिन्सं उकिया कारणत मालेगु ज्या यायेगु जानकारी ब्यूगु दु ।

विशेषयानाः अनया दम्पत्तिइ चीधंगु परिवारया इच्छा अप्वयाः वःगु, महंगी आदि कारणं स्वयेबलय् म्हो जक मचात बुइकेगु चाहना खनेदूगु लुयावःगु छुं नीति निर्मातापिनिगु अनुभव दु ।

अथेहे, चिनियाँ नागरिकपिन्सं लिबाक्क ब्याहा याःगु हुनिं यानाः नं जन्मदर उलि अप्वः मजुइगु अनुमान याःगु दु । उकिं आः चीनय् छम्ह जक मचा बुइकीपिं मांअबुपिनिगु ल्याः हे अप्वः जूवंगु प्रारम्भिक अनुसन्धानपाखें खनेदूगु नं उगु बुखँय् जानकारी ब्यूगु दु ।

Categorized in अन्तर्राष्ट्रिय