nepal life

निम्ह नेतां कार्यदलयात निर्देशन बिइगु, प्रचण्ड बालकोटय्

नेवा: अनलाइन न्युज | २०७४ पौष २६, बुधबार ११:०४:४५

ओली बैठक क्वचायेकाः १२ ता इलय् थाइल्याण्ड वनीगु

वासः यायेगु नितिं थौं बुधवाः थाइल्याण्ड वनेगु तयारीइ यानाच्वनादीम्ह एमाले नायः केपी शर्मा ओलीयात नापलायेत माओवादी केन्द्रया नायः प्रचण्ड ख्वपया बालकोट थ्यंकूगु दु । पार्टी एकता संयोजन समितिया बैठक च्वंगु कन्हय् कुन्हु हे निगू पार्टीया नायः दथुइ सहलह ज्याझ्वः जूगु खः ।

ओलीया प्रेस संयोजक चेतन अधिकारीं निगू पार्टीया नायः दथुइ सुथय् ९ ता इलय् भेटवार्ता जूगु व वधुंकाः कार्यदल दुजःपिन्त निर्देशन बिइगु ज्याझ्वः जूगु जानकारी बियादीगु दु ।

एमाले व माओवादी केन्द्र एकता संयोजन समितिया मंगलवाः च्वंगु बैठकं प्रदेश सरकार व राष्ट्रियसभा गठनय् गृहकार्य यायेत एमालेपाखें सुवास नेम्वाङ, शंकर पोखरेल व सुरेन्द्र पाण्डे व माओवादी केन्द्रपाखें रामबहादुर थापा बादल, बर्षमान पुन व मातृका यादव दुथ्याःगु कार्यदल गठन याःगु खः ।

थ्वहे कार्यदलयात ओली व प्रचण्डं थौं बुधवाः निर्देशन बिइगु ज्याझ्वः दूगु खः ।

ओली १२ ता इलय् थाइल्याण्ड वनीगु

थ्वहे झ्वलय्, एमाले नायः ओली नियमित उसाँय् परीक्षणया नितिं थौं बुधवाः थाइल्याण्ड वनीगु जूगु दु । थौं बुधवाः न्हिनय् १२ः३० ता इलय् थाई एयरवेजपाखें ओली बैंकक वनेत्यंगु जानकारी वय्कःया सचिवालयं ब्यूगु दु ।

जलास्यँ (मिर्गाैला–किडनी) पत्यारोपण यायेधुंकाः नियमित उसाँय् परीक्षणया नितिं ओली बैंकक वनेत्यंगु खः ।

एमाले छ्याञ्जे प्रदीप ज्ञवालीया कथं, ओली उसाँय् परीक्षण क्वचायेकाः माघ २ गते स्वदेश लिहाँ झाइगु ज्याझ्वः तयातःगु दु ।

Categorized in राजनीति