nepal life

नायःखिं बाजं व थीथी भजन सयेकेगु ५० दँ पूवंगु लसताय् ब्वज्या

नेवा: अनलाइन न्युज – ललेन्द्र शाक्य | २०७४ माघ २४, बुधबार १५:१८:३५

येँया स्क्वायर यूनिट येँ जःया ग्वसालय् येँया हे इतुंबहालय् छगू तःजिगु ज्याझ्वः जुइगु जूगु दु ।

थ्वहे वइगु ने.सं. ११३८ सिल्लागा दसमि (माघ २७ गते) शनिवाः न्हिनसिया १ ता ईनिसें ४ ता ईतक न्ह्याइगु उगु ज्याझ्वलय् साक्षात् श्री गणेश व श्री भैरवया समुपस्थिति दइगु जानकारी ग्वसाः खलकं ब्यूगु दु ।

वाङमय् शताब्दी पुरुष संस्कृतिविद् डा. सत्यमोहन जोशीया मूपाहाँसुइ बसन्त ऋतुया सन्दर्भय् काठमाडौं सुनचाँदी व्यवसायी संघ व श्री आकाश भैरव भजनखःया कार्यकारिणी दुजः संघरत्न

शाक्य नायःखिं बाजं व थीथी भजन सयेकेगु न्यय्दँ (५० दँ) पूवंगु लसताय् जुइगु ब्वज्या ज्याझ्वलय् सकलसित सहभागिताया नितिं ग्वसाः खलः स्क्वायर यूनिटं इनाप याःगु दु ।

उगु ब्वज्या ज्याझ्वलय् नायःखिं बाजं व भजन ब्वज्या संघरत्न शाक्य व वय्कःया पुचःपाखें न्ह्यब्वइगु ग्वसाः ग्वयातःगु दु ।

अथेहे, नेपाल संगीत तथा नाट्य प्रज्ञा प्रतिष्ठानया प्राज्ञ भाजु रामकृष्ण दुवाः, काठमाडौं सुनचाँदी व्यवसायी संघया नायः भाजु महेन्द्ररत्न शाक्य, आकाश भैरव भजन खलःया नायः शिव श्रेष्ठपिन्सं थःथःगु नुगःखँ तइगु जूगु दुसा मूपाहाँ शताब्दी पुरुष डा. सत्यमोहन जोशीपाखें नं नुगःखँ तइगु ज्याझ्वः तयातःगु दु ।

Categorized in कला