nepal life

देस विकासय् खेलकुलं विशेष भूमिका म्हिताच्वंगु दुः –मन्त्री केसी

नेवा: अनलाइन न्युज | २०७४ पौष २६, बुधबार १४:५७:२२

–उपेश महर्जन

युवा तथा खेलकुदमन्त्री राजेन्द्रकुमार केसीं देस विकासया नितिं खेलकुद क्षेत्रं ज्वःमदुगु योगदान बिइगु खँ कनादीगु दु ।

थौं बुधवाः किपूया मंगल उच्च मा.वि. व मंगल बहुमुखी क्याम्पसया झिक्वःगु मंगल खेलकुद सप्ताह उलेज्या यानादिसें मन्त्री केसीं देस विकासय् नेपाली खेलकुदं विशेष भूमिका म्हिताच्वंगु चर्चा यानादिसें थुगु खँ तयादीगु खः ।

मन्त्री केसीं धयादी, “निश्चित रुपं पढाईया महत्वपूर्ण भूमिका दइगु जूसां नं शारिरीक स्वास्थ्ययात ध्यानय् तयाः देस विकासया ज्यायात न्ह्यज्याकेत खेलकुद जीवन अपरिहार्य जुइ । नेपालय् नं महत्वपूर्ण विद्याया रुपं खेलकुद विकासया नितिं त्रिभुवन विश्वविद्यालयस याकनं हे केन्द्रीय खेलकुद विभाग पलिस्था जुइत्यंगु दु ।”

त्रिभुवन विश्वविद्यालयस विश्वस्तरया कभर्ड हल निर्माणलिसें किपूया बासिन्दापिनिगु नितिं २ करोडया बजेट विनियोजन जुइधुंकूगुलिं न्हूबजाः क्वय् बसपार्कया खुल्ला मैदानय् मेगु कभर्ड हल निर्माण जुइगु मन्त्री केसीं उगु ज्याझ्वलय् जानकारी बियादीगु खः ।

किपूबासीपिन्सं हाकनं छक्वः प्रतिनिधिसभाय् निर्वाचित याकाः छ्वःगुलिं सुभाय् बियादिसें मन्त्री केसीं याकनं हे उपभोक्ता समिति नीस्वनाः कभर्ड हल निर्माण यायेत सम्बद्ध पक्षया ध्यानाकर्षण याकादिल ।

फुक्क विद्यालय व क्याम्पसं खेलकुदया नितिं विद्यार्थीपाखें वार्षिक शुल्क म्हयाः च्वंसां नं खेलकुदया ज्याझ्वःत यायेगु यानाः मच्वंगुलिं मन्त्री केसीं दुखेसो प्वंकादीगु खः ।

खेलकुदया विकासया नितिं मन्त्री केसीं खेलकुद विकासया नितिं कासा प्रशिक्षकपिन्त बास्केटबल, फुटबल व भलिबल लःल्हानादीगु खः ।

ज्याझ्वलय् प्रदेशसभाया नितिं येँ १० नम्बर निर्वाचन क्षेत्रपाखें निर्वाचित जुयादीम्ह पुकार महर्जनं देश विकासया नितिं फुक्क छधी छप्पं जुयाः न्ह्यज्यायेमाःगुलि बः बियादीगु खः ।

प्राचार्य लोकलाल महर्जन, क्याम्पस प्रमुख प्रदीप महर्जन, विद्यालय व्यवस्थापन समितिया नायः प्रा.डा. शिवशरण महर्जनपिन्सं ज्याझ्वलय् खेलकुदया विकास बारे थःथःगु धारणा तयादीगु खः ।

शिक्षा मन्त्रालयपाखें नमूना विद्यालय घोषणा जुइधुंकूगु मंगल उच्च माध्यमिक विद्यालयया विद्यार्थीपिं पाखें एसियास्तरया कास्य पदकत त्याकेधुंकूगु जानकारी विद्यालयया शिक्षक रक्की महर्जनं जानकारी बियादीगु खः ।

खेलकुद सप्ताहय् फुटसल, भलिबल, बास्केटबल, टेबुल टेनिस, एथ्लेटिक्स लिसेंया खेलकुद समावेश जूगु खःसा खेलकुद सप्ताह न्यान्हु यंकं न्ह्याइगु जानकारी नं ब्यूगु दु ।

Categorized in कासा