nepal life

देय् न्यंकया स्थानीय तहलय् ८३० म्ह आइटी अफिसर माग

नेवा: अनलाइन न्युज | २०७४ आश्विन ३१, मंगलबार १२:०५:४२

तलब ४०,०००/–

धेंधेंबल्लाय् बन्देज तःगु धासें विज्ञान प्रविधि संकायया विद्यार्थीपिं आन्दोलित

देय् न्यंकंया ७५३ गू स्थानीय तह व ७७ जिल्ला समन्वय समितिइ सुचं प्रविधि अधिकृत (आइटी अफिसर) नियुक्तिया नितिं स्थानीय विकास मन्त्रालयं दरबन्दी छ्वःगु दु ।

तर, त्रिभुवन विश्वविद्यालय इन्जिनियरिङ अध्ययन संस्थानपाखें आइटी इन्जिनियरिङ याःपिन्सं जक ह्वताः कायेदइगु जुइधुंकाः विज्ञान व प्रविधिपाखेया विद्यार्थीपिं आन्दोलित जूगु दु ।

संघीय मामिला व स्थानीय विकास मन्त्रालयं स्थानीय शासन व सामुदायिक विकास ज्याझ्वःया थप दच्छिया नितिं बजेट तकं विनियोजन यानाः असोज २६ गते स्थानीय तहयात परिपत्र यायेधुंकाः उगु विषय पिहाँ वःगु खः । त्रिवि अन्तर्गत इन्जिनियरिङ अध्ययन संस्थान व विज्ञान व प्रविधि अध्ययन संस्थान ब्यागलं ब्यागलं संकायं छगू हे प्रकृतिया अध्ययन अध्यापन याकाः वयाच्वंगु दु ।

मन्त्रालय व इन्जिनियरिङ अध्ययन संस्थान दथुइ समझदारी पतिइ ल्हाःचिं तयाः स्थानीय तहलय् करारय् नियुक्ति कायेगु व उपिं आइटी अफिसरया तलब मासिक ४०,००० तका जुइगु न्ह्यथनातःगु दु । आइटी अफिसर जुइत त्रिबि इन्जिनियरिङ अध्ययन संस्थानपाखें इन्जिनियरिङ याःपिन्स जक कायेखनीगु जुइधुंकाः मेमेगु विश्वविद्यालयपाखें आइटीइ इन्जिनियरिङ याःपिं विद्यार्थीपिं नं उगु ह्वताःपाखें बञ्चित जुइगु जूगु दु ।

त्रिवि अन्तर्गतया हे विज्ञान व प्रविधि संकायया विद्यार्थीपिन्सं थःपिन्त विभेद जूगु धासें सम्बन्धित निकायस दबाब ब्यूगु दु । त्रिविपाखें विज्ञान व प्रविधि अध्ययन यानाः प्यदँ विएस्सी एआइटी याःपिं विद्यार्थीपिन्सं नं स्थानीय तहया आइटी अफिसरय् धेंधेंबल्ला याये खनेमाःगु माग तःगु खः ।

अमृत साइन्स क्याम्पसपाखें बिएस्सी एसआइटी याःम्ह अनेरास्ववियुया नेता गोपाल नेपालं स्थानीय विकास मन्त्रालयया परिपत्रं आइटी अध्ययन याःपिं द्वलंद्वः विद्यार्थीपिन्त अन्याय याःगु धाःगु दु । वय्कलं धयादी, “जिमिसं नं प्यदँ विज्ञान प्रविधि विषयस हे ब्वनागु खः, जिमित थन बञ्चित यात धाःसा जिमिसं मेमेथाय् धेंधेंबल्ला यायेगु थाय् हे दइमखु ।”

प्यदँ ई तुकाः नेपाःया त्रिभुवन विश्वविद्यालयपाखें दीक्षित जुइधुंकाः बेरोजगार च्वनेमालीगु अवस्था सरकारं सिर्जना मयायेमा धकाः स्वन्ति लिपाः संघर्षया तयारी जुयाच्वंगु खँ नं नेपालं धयादिल ।

छु धाल ले डीनं, “जिमिसं पौ छ्वये धुनागु दु”

थ्वहे झ्वलय् त्रिवि विज्ञान व प्रविधि अध्ययन संस्थानं ७५३ गू स्थानीय तह व ७७ गू जिससय् आइटी अफिसर नियुक्तिइ थः विद्यार्थीपिन्सं नं समान धेंधेंबल्लाया ह्वताः कायेखनेमाःगु धासें स्थानीय विकास मन्त्रालययात लिखित पौ छ्वयाः आग्रह याःगु दु ।

विज्ञान व प्रविधि अध्ययन संस्थानया डीन रामप्रसाद खतिवडां सोमवाः हे संस्थानं अध्यापन याकेगु पाठ्यक्रमया ढाँचालिसें आइटी अफिसरय् थः विद्यार्थीपिन्त नं धेंधेंबल्लाया ह्वताः बिइत पौ छ्वयागु धाःगु दु ।

वय्कलं धयादी, “वय्कःपिन्सं इन्जिनियरिङ अध्ययन संस्थानयाके जक सम्झौता याःगु जुयाच्वन । थ्व खँ सीकाः जिमिसं नं आइटीया विद्यार्थी उत्पादन यायेगु पाठ्यक्रम दूगुलिं फुक्क विषयवस्तु लिसें छ्वयागु दु । थुलि तःधंगु ह्वताःपाखें जिमि विद्यार्थीपिं बञ्चित मजुइमा धैगु खँय् सचेत जुयागु दु ।”

७५३ गू स्थानीय तह व ७७ गू जिल्ला समन्वय समिति यानाः ८३० गू स्थानीय तहलय् आइटी अफिसर तयेमाःगु जूगुलिं विज्ञान प्रविधिया विद्यार्थीपिनिगु नितिं थ्व तःधंगु ह्वताः खः । गुलिखे स्थानीय तहलय् छगू जक आइटी अफिसरं मगाइगु जूगुलिं नं थप करारय् नियुक्ति यायेमाःगु मन्त्रालयं जानकारी ब्यूगु दु ।

विज्ञान प्रविधि अध्ययन संस्थान अन्तर्गत ५५ गू कलेजपाखें दँय् दसं २,००० सिबें अप्वः सुचं प्रविधि विज्ञ जनशक्ति उत्पादन जुइगु जुयाच्वंगु दु ।

Categorized in लजगाः