nepal life

दीलिप रायमाझीया मंसीर २९ गते वइगु ‘गोरे’ संकिपाय् न्हूूम्ह एक्शन हिरो वइगु

नेवा: अनलाइन न्युज | २०७४ मङ्सिर १६, शनिबार १९:५७:११

छगु ईलय् दर्पणछाँया , जिन्दगानी थेंज्यागु लोकंह्वाःगु खस नेपाली संकिपा म्हितुम्ह हिरो दिलिप रायमाझी अमेरिकाय् च्वना वया च्वंगु ताःदय् धुंकलसा आः ताः ई लिपा वयागु न्हूगु संकिपा ‘गोरे’ रिलिज जुईत्यंगु दु । थःगु संकिपा रिलिज जुइगु जूगुलिं थौंकन्हे थुकिया प्रमोशनयालागिं दीलिप रायमाझी नेपालय् वया च्वंगु दु ।

शिव श्रेष्ठं शुरु याःगु एक्शन स्टारया ईमेजय् लिपा वना सुशील क्षेत्री , निखिल उप्रती , विराज भट्ट थेज्यापिं एक्शन स्टार खनेदयेक वःगु खःसां इपिंमध्ये विराज भट्ट व सुशील क्षेत्री थ्व ख्यलं तापाना च्वंगु दु । थुकथं नेपाःया संकिपा ख्यलय् एक्शन स्टारया अभाव जुया च्वंगु ईलय् ‘गोरे’ पाखें छम्ह न्हूम्ह एक्शन नायकया उदय जुईत्यंगु दु ।

‘गोरे’ संकिपाय् मार्शल आर्ट ताईक्वाण्डोया अन्र्तराष्ट्रिय प्रशिक्षक जुया च्वंम्ह राकेश कुमार राई हिरोया रुपय् पिलूवय्त्यंगु दुसाः थ्व संकिपा ‘गोरे’ यही मङ्सीर २९ देशय् न्यंक्क रिलिज जुइगु जूगु दु । ‘गोरे’ एक्शन, रोमान्टिक एवं समसामयिक विषयवस्तुया बाखनय् आधारित मनोरञ्जनात्मक संकिपा जूगुलिं व्यवसायिक रुपं सफल जुइगु खँय् विश्वास निर्माणपक्षं प्वंकूगु दु ।

रामेश कुमार राईया निर्देशनय् दय्कूगु ‘गोरे’संकिपाय् दिलिप रायमाझी, अनु शाह, रबिन्द्र आचार्य, खुश्बु खड्का, बिमला गिरी, सुरवीर पण्डित, ममता शर्मा, सूर्य जि.सि.या लिसेलिसें नवप्रस्तुती राकेशकुमार राई, डा.गुन्नु घर्ति, अभिषेक गिरी आदी कलाकार पिनिगु अभिनय स्वय्दइगु जूगु दु । जि.एस. मुभि मेकर्सया व्यानरय् निर्माण याःगु थ्व संकिपाया प्रस्तुतकर्ता सूर्य जि.सि. खः अले रुपा जि.सि. थ्व संकिपाया निर्मात्री खः ।

Categorized in कला