nepal life

दाफा महोत्सव न्हूगु उत्साह कथं न्ह्यानाच्वंगु दुः भाइकाजी मर्हजन

नेपालमण्डल टेलिभिजनं ऐतिहासिक ज्याझ्वः कथं दाफा महोत्सव न्ह्याकाच्वंगु दु । वंगु कार्तिक १२ गतेनिसें वइगु फागुन १४ गतेतक जुइगु उगु दाफा महोत्सवय् थीथी दाफा खलःत उत्साहित जुयाः ब्वति कयाच्वंगु दु ।
यलया ललितपुर मलय् वाःपतिं शुक्रवाः व शनिवाः जुयाच्वंगु दाफा महोत्सवयात कयाः नेपालमण्डल टेलिभिजनया प्रबन्ध निर्देशक लिसें दाफा महोत्सव निर्देशन समितिया न्वकू भाईकाजी महर्जन ‘नयन’लिसें नेवाः अनलाईनन्यूजं याःगु खँल्हाबल्हा संक्षिप्त रुपं न्ह्यब्वयाच्वना । –सं.

दाफा महोत्सव गुकथं न्ह्यानाच्वंगु दु ?

विचाः मयाःकथं थुगु महोत्सवया दाफा खलःपिन्सं ब्वति कयाच्वंगु दु । महोत्सव याये धकाः विचाः यानाबलय् थुलि दाफा खलः पुचःत सहभागी जुइ धकाः विचाः हे मयाना । थ्वल्याखं स्वयेगु खःसा दाफा महोत्सव अतिकं बांलाक्क व न्हूगु उत्साह कथं न्ह्यानाच्वंगु दु । थ्वहे हुनिं थुगु महोत्सव न्याला तक न्ह्यायेत्यंगु खः ।

थुगु महोत्सवया मू आज्जु छु खः ?

नेवाः संस्कृतिइ दाफा थायेगु प्रचलन ऐतिहासिक रुपं नं महत्वपूर्ण खः । नेवाः जातिया फुक्क उप–जातय् दाफा थायेगु चलन दु । तर, थ्व महत्वपूर्ण झीगु संस्कृति व परम्परा बुलुहुँ तनावनीगु खतरा नं उतिकं हे खनेदत । न्हूपुस्तां दाफाया महत्वयात मथुयाः वंगु व संगठित रुपं दाफाया परम्परायात न्ह्याके मफुगुलिं नं थुकथं दकले न्हापां दाफा महोत्सव यानागु खः । अथेहे, वंगु दँया तःभुखाचं यानाः गुलिखे दाफा थायेगु फल्चा, छेँ च्वनेमज्यूगु स्थिति दु । थ्व ल्याखं नं थ्व महोत्सव यायेमाःगु खः । दाफा थायेगु परम्परा व संस्कृतियात देय् न्यंकं जक मखु, हलिमय् न्यंकं प्रचार प्रसार यायेगु नितिं दाफा महोत्सव यानागु खः ।

थ्व महोत्सवयात राज्यपाखें गुकथंया ग्वाहालि जुयाच्वंगु दु ?
 
दाफा महोत्सव झीसं राष्ट्रपति विद्यादेवी भण्डारीया ल्हाःतं यानागु खः । राज्यपाखें ग्वाहालि यायेगु बचं ला बियाच्वंगु दु । लिसें थुगु महोत्सव गुकथं न्ह्यानाच्वंगु दु, गथे जुयाच्वंगु दु, थुकिया जानकारी सरकारया सम्बन्धित निकाय नं कायेगु यानाच्वंगु दु । आःया नितिं सकारात्मक खँ थ्वहे खः ।
 
थुगु महोत्सवया व्यवस्थापन यायेत गुलि थाकुल ?

न्हापा ला थ्व महोत्सव थुलि तःजिक जुइ धकाः बिचाः मयाना । तर, न्यय्गु–खुइगु दाफा खलःतसें ब्वति काः वयेवं थुकिया व्यवस्थापन यायेत छुं भच्चा थाकूगु दु । वालय् निक्वः धाःसां खलः पुचःयात व्यवस्थापन यायेगु, उकिया ज्याझ्वःया समायोजन यायेगु भच्चा थाकूगु हे खः । तर आः ज्याझ्वः तालिका कथं न्ह्यानाच्वंगु दु । थाकू अःपू अथेहे खः ।

दाफा महोत्सवयात कयाः प्रचारप्रसार गुकथं जूगु तायेका ?

दकले न्हापां ला दाफा महोत्सवया महत्वयात थुइकाः राष्ट्रपति विद्या भण्डारी थ्व ज्याझ्वःया उलेज्या यायेत झायादीगुलिं हे थुगु महोत्सव राष्ट्रव्यापी रुपं प्रचारप्रसार व महत्वपूर्ण ज्याझ्वः कथं जूवंगु दु । प्रचारप्रसारया ल्याखय् फुक्क धयाथें नेपाःया संचारमाध्यमतसें थ्व ज्याझ्वःया प्रचारप्रसार याःगु दु । मेखे झीगु थःगु हे टेलिभिजन नेपालमण्डलपाखें दाफा महोत्सवया प्रत्यक्ष प्रसारण यानागु दु । जिं स्वये दाफा महोत्सवया प्रचारप्रसार गाक्वं जूगु दु ।

आर्थिक व्यवस्थापन गुकथं यानादिया ?

आर्थिक पक्षयात खँ ल्हायेगु खःसा मुक्कं थ्व ज्याझ्वःयात ग्वाहालि ललितपुर मलं नं याःगु खः । वय्कःपिनिगु ग्वाहालिं हे थ्व महोत्सव ताःलानाच्वंगु खः । आर्थिक रुपं झीसं दाफा खलः पुचःयात तःधंगु ग्वाहालि छुं नं यायेफूगु मदु । झीगु परम्परा कथं बाजं पितहये न्ह्यः बिइमाःगु केपु कथं द्वःछि तका दां स्वनिगलय् च्वंपिन्त व स्वनिगलं पिने च्वंपिन्त निद्वः तका दां देछानागु दु ।

दाफा महोत्सवय् तापाक्कंनिसें गनं गनं ब्वति काःगु दु ?

नेवाःत दूगु गां–बस्ती–लागाया सहभागिता अतिकं हे बांलाः । स्वनिगः पिने दोलखा, तिस्तुङ–पालुङया लिसें थीथी जिल्लाया दाफा खलःपिन्सं ब्वति काःगु दु ।

दकले लिपा छुं धयादी कि ?

दकले न्हापां ला दाफा महोत्सव थथे तःजिक न्यायेकेत ग्वाहालि यानाः वयाच्वंपिं सकलसितं सुभाय् देछाना । विशेष रुपं आर्थिक ग्वाहालि याःगु व ललितपुर मलय् थाय् बियाः ललितपुर मलयात दुनुगलंनिसें सुभाय् देछाना । अथेहे, थीथी दाफा खलःपिन्सं उत्साहपूर्वक ब्वति कयादीगुलिं वय्कःपिन्त नं सुभाय् देछाना । मेता खँ दाफा महोत्सव धाःसां थ्व महोत्सवया उत्साहया हुनिं दाफा महोत्सवया लाखे प्याखं, ख्याः प्याखं, माकः प्याखंया लिसें थीथी कथंया नेवाः संस्कृति ज्याझ्वः नं क्यनेमाल धकाः ब्वति कायेत वयाच्वंगु दु । इमित नं दुनुगलंनिसें सुभाय् देछाना । मेता खँ ला थुगु महोत्सव झीगु थःगु हे विस्कं कथंया म्हसीका दूगु ज्याझ्वः जूगुलिं थुगु ज्याझ्वलय् सकलसितं ब्वति कायेत इनाप यानाच्वना ।
 थ्व नं ब्वनादिसँ  थुकथं न्ह्यानाच्वंगु दु – नेपालमण्डल दाफा महोत्सव