nepal life

थ्व चुनावय् नेवाःतय् भूमिका छु जुइमाः ?

नेवा: अनलाइन न्युज | २०७४ मङ्सिर १२, मंगलबार ११:४६:२९

निश्चल
संघीय लोकतान्त्रिक गातन्त्रया संविधान जारी जुइधुंकाः नेवाः आन्दोलनया कार्यदिशा छु जुइमाः धइगु बहस न्ह्यायेमाःगु खः । तर न्ह्यायेमफुत । तर वस्तुगत स्थितिं यानाः नेवाःत थौंतक थ्यंबलय् संविधानयात आलोचनात्मक समर्थन यानाः थुकियात उपयोग यायेगु नीतिइ हे थ्यंवन ।

पहिचानसहितया संघीयता मवःगु हुनिं क्यनाः संविधानयात अस्वीकार याःगु पक्षं नं संविधानय् संशोधन जुइगु खःसा स्वीकार यायेफइगु खँ ल्हाल्हां चुनावतकया ई वःबलय् थःगु मुद्दा जारी हे दु धकाः धासें चुनावय् ब्वति काःगु खनेदत । थुकिं म्हुतुं न्ह्याग्गु भाय् ल्हाःसां आः पहिचानवादी आन्दोलन नं संविधानयात उपयोग यासें वःगु उपलब्धियात छ्यलाः न्ह्यायेगु लँपु हे वन । राजनीतिक मूलधारपाखें अलगथलग जुयाः विद्रोहया निंतिं गुगुं संगठित कुतः जूगु खनेमदु ।

खतुं २०७२ सालया संविधान धइगु खस जातीय वर्चस्व दुगु सत्ता व मधेसी÷जनजाति आन्दोलन दथुइ जूगु सम्झौताया दस्तावेज हे खः । संघीयता विरोधीतसें संघीयतायात स्वीकार यायेत बाध्य जुइधुंकाः थःगु वर्चस्व कायम यायेगु लँपु लिल । थुकी नं फुक्क प्रदेश उत्तर दक्षिण फायाः दयेकेगु कुतः याःगुली थुकी नं संघीयता विरोधीत असफल जुल । २०४७ सालया संविधानय् धार्मिक मधाःगु धाल । फुक्क भाय्यात राष्ट्रभाषा घोषित यात । तर खस नेपाली भाय्यात सुरक्षित यायेत व प्रदेशय् सरकारी कामकाजी भाषा धकाः तयाः मेगु निगू भाय् प्रदेशय् सरकारी कामकाजी दयेकेफइगु खँ तयाबिल ।

वस्तुतः थ्व वर्चस्वया लडाइँलय् खँय् सत्ताधारीतसें थःगु पुलांगु वर्चस्वयात कायम यायेगु कुतलय् सुरक्षित अवतरण यानाः खतरां मुक्त जुइत, सम्झौतावादी नीति काःगु खनेदु । फुक्क थासं संघीय कानुन कथं जुइ धइगु वाक्यांश तःगुया अर्थ इपिं थःगु नियन्त्रणं ज्याखँ पिहां वनी धइगु ग्याःचिकु मानसिकताया लिच्वः हे खः ।

अथे जूगुलिं आःया चुनाव धैगु नं थ्व हे वर्चस्वया लडाइँया छगू मोर्चा कथं नेवाःतसें थुइकेगु बेस जू वइ । थन नेवाः धकाः धायेबलय् थीथी राजनीतिक दलय् दुने दुपिं व मदुपिं नेवाःत नं खः । थःगु हे पार्टी दुने उम्मेदवारीया सवालं निसें कयाः चुनाव त्याकेगु व अनंलि प्रतिनिधि सभा व प्रदेश सभाय् थःगु मतदातातय्गु प्रतिनिधित्व यानाः न्ववायेगु, लबिङ यायेगु व गुगु नं निर्णय जुइगु इलय् उगु निर्णययात अधिकतम रुपं थःगु पक्षय् हयेत स्वयेगु ज्या यायेमाः । थुकिया निंतिं प्रतिनिधित जक तयार जुयां मगाः, पृष्ठभूमिइ झी नेवाः जनता नं तयार जुइमाः ।

Categorized in बिचा: