nepal life

थौं २७ क्वःगु नारायणगोपाल स्मृति साँझ–२०७४ किपुलिइ

नेवा: अनलाइन न्युज – ललेन्द्र शाक्य | २०७४ मङ्सिर १८, सोमबार १०:०१:५८

थौं मंसीर १८ गते सोमवाः किपूया बाघभैरब प्रजा दबुलिइ सनिलया ४ ता इलय्

राजेश महर्जन नेवाः, विश्व नेपाली, कालीप्रसाद बाँस्कोटा, सनुप पौडेल, मानसराजलिसें तालतन्त्रया विद्यार्थीपिनिगु नारायणगोपालया म्ये ब्वज्या

किपूया ९ वडा बाहिगां तगःवपिइ च्वंगु तालतन्त्र फाईन आर्टस् एण्ड म्यूजिक एकेदेमिया ग्वसालय् २७ क्वःगु नारायणगोपाल स्मृति साँझ–२०७४ जुइगु जूगु दु ।

स्वरसम्राट नारायणगोपाल गुरुवाचार्य बि.सं. २०४७ मंसीर १९ गते मदुगु खः । थौं मंसीर १८ गते सोमवाः नारायणगोपाल मदूगु लुमन्तिइ पूर्व सन्ध्याय् लाकाः उगु एकेदेमिं थुगु सांगितिक ज्याझ्वः यायेत्यंगु खः ।

किपूया १ वडा बाघभैरब प्रजा दबुलिइ जुइगु उगु सांगितिक ज्याझ्वः सनिलया ४ ता इलंनिसें न्ह्याइगु जानकारी एकेदेमिया प्रेसिडेन्ट सुविन श्रेष्ठं नेवाः अनलाइन न्यूजयात जानकारी बियादीगु दु ।

एकेदेमिया प्रेसिडेन्ट सुविन श्रेष्ठं बियादीगु जानकारी कथं नेपाःया नांजाःपिं गायक संगीतकारपिं राजेश महर्जन नेवाः, कालीप्रसाद बाँस्कोटा, सनुप पौडेल, विश्व नेपाली व मानसराजपिनिगु विशेष उपस्थिति व वय्कःपिन्सं थःथःगु सांगितिक प्रस्तुति न्ह्यब्वइगु जूगु दु ।

अथेहे, तालतन्त्र फाइन आर्ट्स एण्ड म्यूजिक एकेदेमिया विद्यार्थीपिन्सं मुक्कं स्वरसम्राट नारायण गोपाल गुरुवाचार्यया म्येत हालाः थःगु प्रतिभा न्ह्यब्वइगु जानकारी नं एकेदेमिया प्रेसिडेन्ट सुविन श्रेष्ठं बियादीगु दु ।

उगु एकेदेमिं वंगु दँय् नं स्वर सम्राट नारायणगोपालया २६ क्वःगु स्मृति साँझ किपूया बाघभैरब प्रजा दबुलिइ हे याःगु खः ।

थुगु ज्याझ्वः न्ह्याकेगु नितिं तालतन्त्र एकेदेमियात के.एम.एन. सर्भिसेज मू प्रायोजक जुयाः ग्वाहालि याःगु दु ।

ग्वसाः खलः तालतन्त्र म्यूजिक एकेदेमिं स्वरसम्राट नारायण गोपालया संगीत पारखीपिन्त उगु ज्याझ्वलय् ब्वति कायेत इनाप याःगु दु ।

Categorized in कला