nepal life

थौं सिलाचःह्रे, महाशिवरात्री

नेवा: अनलाइन न्युज | २०७४ फाल्गुण १, मंगलबार १०:४८:५४

थुगु दँ पशुपतिइ गजि, भाङ, धतुरो लिसेंया लागुपदार्थ निषेत्र याःगु दु । थुज्वःगु पदार्थ सेवन व बेचबिखन याःगु लातकि प्रहरीं ज्वनाः कारवाही याइगु कोषया सदस्य सचिव डा. प्रदीप ढकालं जानकारी बियादीगु दु ।

सिलाचःह्रे (महाशिवरात्री) पर्व महाद्यःया पूजा आराधना यानाः थौं मंगलवाः देय् न्यंकं न्यायेकूगु दु । शिवरात्री दँय् दसं फागुन कृष्ण चतुर्दशीया दिं न्यायेकीगु पर्व खः ।

वैदिक सनातन हिन्दु धर्मावलम्बीपिं थौंया दिं सुथंनिसें खुसि, कुण्ड व पुखुलिइ वनाः म्वः ल्हुयाः महाद्यः दुथाय् शिवालयस वनाः श्रद्धा भक्ति प्वंकाः पूजा आराधना यायेगु याइ । महाद्यः उत्पत्ति जूगु ‘चा’या नामं नामांकन जूगु थुगु पर्व कालरात्री, मोहरात्री, सुखरात्री व शिवरात्री नामं प्यंगू मू रात्रीमध्ये थ्व पवित्र पर्वया रुपं शिव पुराण लिसेंया ग्रन्थय् वर्णन यानातःगु दु ।

फागुन कृष्ण चतुर्दशीया दिं न्यायेकीगु थुगु पर्वयात सकल दिनदुःखी व कष्टपूर्ण अवस्थाय् लानाच्वंपिं प्राणीया नुगलय् धर्मया उदय याकीम्ह आशुतोष महाद्यःया अतिकं यःगु दिंया रुपं कायेगु याः । माघ महिनाय् महाद्यःया रुद्रत्व अर्थात् जगतयात ख्वयेकीगु वा संहार याइगु तत्वं यानाः हः विहीन जुयाः जीर्ण जुयाच्वंगु सिमा, बोटविरुवा व झाः वहे महाद्यःया शिवत्व (जगतया कल्याण याइगु तत्व) पाखें यानाः हराभरा जुइगु जुयाः फागुनय् शिवरात्री न्यायेकेगु यानातःगु धापू दु ।

ब्रतमध्य सर्वोत्तम महाशिवरात्रीया दिं थौं मंगलवाः भक्तजनपिन्सं शुद्ध जुयाः महाद्यःया देगलय् पूजा अर्चना यानाः ब्रत च्वनीगु व महाद्यःया यःगु वस्तु दुरु, धतुरो व बेलपत्र छायेगु याइ । थुगु पर्वया दिं उपवास यानाः चच्छि जाग्राम च्वंसा सर्वसिद्धि लाभ जुयाः यमलोक वनेम्वाःलिगु धार्मिक विश्वास दु । थौैंया दिं महाद्यःयात चिकुइगु जनविश्वासं प्रत्येक छेँ, चुक व देगः न्ह्यःने सिँ फ्वनाहयाः धुनी जगेयानाः भजनकीर्तनया लिसें वहे मिँइ प्रसाद दयेकाः ग्रहण यायेगु याइ ।

सुं सुं मनूतसें फागुन २ गते शिवरात्री धकाः धायेगु याःसां नं नेपाल पञ्चांग निर्णायक समितिं ताःहाकःगु सहलह लिपा सब्बु चान्हय् चतुर्दशी लाःगु दिंयात मानेयाःगु समितिया नायः प्रा.डा. रामचन्द्र गौतमं जानकारी ब्यूगु दु ।

राष्ट्रिय सांस्कृतिक पर्व थौंया दिं पशुपतिनाथय् ‘चा’या प्यंगू प्रहरय् प्यंगू कथंया पूजाया लिसें महादीप, अखण्डदीप, लक्ष्यबत्ती व दीपोत्सवया लिसें लक्ष्य विल्लपत्र अर्पण यायेगु याइ । कैलाशकूट व किराँतेश्वर संगीत आश्रमय् शास्त्रीय सांगितिक ज्याझ्वः याइ । महाद्यःया दर्शन यायेत व शिवरात्री पर्वया मेला स्वयेत थौं देय् न्यंकंया थीथी थासं लिसें भारतया तीर्थयात्रीपिनिगु पशुपतिनाथ देगलय् भीड जुइगु परम्परा दु ।

पशुपति क्षेत्रय् मेलाय् सहभागी जुइपिं भक्तजनया सुविधाया नितिं थुगु दँ विशेष प्रबन्ध यानातःगु पशुपति क्षेत्र विकास कोषं जानकारी ब्यूगु दु । थुगु दँ पशुपतिइ गजि, भाङ, धतुरो लिसेंया लागुपदार्थ निषेत्र याःगु दु । थुज्वःगु पदार्थ सेवन व बेचबिखन याःगु लातकि प्रहरीं ज्वनाः कारवाही याइगु कोषया सदस्य सचिव डा. प्रदीप ढकालं जानकारी बियादीगु दु ।

सुं सुं मनूतसें फागुन २ गते शिवरात्री धकाः धायेगु याःसां नं नेपाल पञ्चांग निर्णायक समितिं ताःहाकःगु सहलह लिपा सब्बु चान्हय् चतुर्दशी लाःगु दिंयात मानेयाःगु समितिया नायः प्रा.डा. रामचन्द्र गौतमं जानकारी ब्यूगु दु । शिवरात्रीया पूर्वसन्ध्याय् योगी नरहरिनाथ आध्यात्मिक परिषदं थौं मंगलवाः गुह्येश्वरीनिसें न्हूबानेश्वरया छक्कुबक्कु तक महाद्यः पार्वती रथयात्रा पिकाःगु दु ।

Categorized in राष्ट्रिय