nepal life

थौं विश्व रेडियो दिवस, न्यनीपिं म्हो जूसां नं महत्व म्हो मजू

नेवा: अनलाइन न्युज | २०७४ फाल्गुण १, मंगलबार १५:१७:१३

सूचना व प्रविधिया विकासलिसें रेडियो न्यनीपिं म्हो जूसां नं अझ नं रेडियोया महत्व धाःसा म्हो जूगु मदु । नेपालय् रेडियो पलिस्था जूगु खुगू दशक पुलेधुंकूगु दु ।

सुरु सुरुइ सूचना व प्रविधिया विकास बालाक्क जुइमफूगु खः । उकिं उगु इलय् रेडियोया महत्व अतिकं तःधं । आः नं महत्वया ल्याखं एफएम रेडियो न्ह्यःने हे लानाच्वंगु धयादी नेपाल पत्रकार महासंघया केन्द्रीय छ्याञ्जे शीतल महतों ।

अनलाइन, पत्रिकाया थःगु हे पाठक व टेलिभिजनया थःगु हे स्वकुमि, न्यनीपिं दःसां नं रेडियोया ब्यागलं न्यनामिपिं दूगु महतों धयादीगु दु । वय्कलं धयादी, “सहज पहुँचया ल्याखं नं सर्वसाधारणया सशक्त सुचंया साधन रेडियो हे खः ।”

चितवनया न्हापांगु रेडियो स्टेशन सिनर्जी एफएमया स्टेशन म्यानेजर अमर प्रधान रेडियोया न्यनामिपिं म्हो जूसां नं महत्व अझ नं दूगु धयादी । अझ नं दंगु, सहज व सरल सुचं कायेगु माध्यमया रुपं रेडियो न्हाप हे जूगु वय्कलं दाबी यानादी ।

विगतय् सुचं कायेत रेडियो नेपाल, बीबीसी, अल इण्डिया रेडियो सकसिगु न्ह्यःने लोकंह्वाःगु खः । तर लिपांगु इलय् एफएम रेडियोया विकास व विस्तार जुइधुंकाः धाःसा सर्वसाधारण सुचंया पहुँचय् ह्वात्त हे अप्वल । वधुंकाः रेडियो नेपालसिबें एफएम रेडियो सर्वसाधारणय् सहज सुचंया माध्यम जुइत ताःलात ।

लिपांगु इलय् धाःसा मोबाइलय् हे विश्वया फुक्क सुचं वइगु जूगुलिं रेडियोया न्यनामिपिं धाःसा म्हो जुजुं वनाच्वंगु क्रम न्ह्यानाच्वंगु दु । अनलाइन माध्यम आः प्रभावकारी जुजुं वनाच्वंगु दु । तर नं फुक्क पत्रिका, अनलाइन माध्यमत गांया पहुँचय् थ्यने फयाच्वंगु मदुनि । थ्यंसां आपालं खर्चिलो जू ।

नेपाल पत्रकार महासंघया जिल्ला नायः राधेश्या खतिवडा शहर बजारय् रेडियो न्यनीपिं न्यनामिपिं म्हो जूसां नं अझ नं गामय् सुचंया माध्यम रेडियो हे जुयाच्वंगु धयादी ।

खतिवडाया कथं चितवनय् १४ गू रेडियो दु । छुं रेडियो चालीगु क्रमय् दु । उकी बच्छिथें सामुदायिक रेडियो दु । आः मू कथं जिल्लाय् सिनर्जी व कालिकालिसें त्रिवेणी एफएम, हाम्रो एफएम, रेडियो चितवन, अर्पण, ग्रेट एफएम, रिलेशन एफएम, रेडियो नारायणी, माडी एफएम, ड्रिम्स एफएम लिसेलिसें रेडियोत संचालनय् दु ।

चितवनया इतिहासय् २०५८ कार्तिक २६ गते न्हापांगु रेडियो सिनर्जी एफएम चाःगु खः । मेगु दँ कालिका एफएम संचालनय् वःगु खः । वधुंकाः छसिंकथं रेडियो चालीगु क्रम न्ह्याःगु खः । सिनर्जी एफएम राजधानी पिनेया हे खुगूगु व नेपाःया १४ क्वःगु रेडियोया रुपं पलिस्था जूगु खँ सिनर्जी एफएमया स्टेशन म्यानेजर अमर प्रधानं धयादी ।

उगु इलय् सुचंया महत्वपूर्ण माध्यम रेडियो खः । लोकतन्त्र पलिस्थाय् नं रेडियोया थःगु हे कथंया भूमिका दूगु लुमंकादी प्रधानं । लिपांगु इलय् वडा वडा, त्वाःत्वालय् रेडिया चायेकेगु चलनं अस्वस्थ धेंधेंबल्ला हःगु खः धकाः वय्कलं धयादी ।

प्रविधिया हे हुनिं रेडियोया आकर्षण छुं म्हो जूसां नं पहुँचय् धाःसा आःतक नं न्हापांगु ल्याखय् दु दूगु प्रधानं दाबी यानादी ।

लिपांगु इलय् रेडियो लाक्वपाक्व चायेकेगु चलन वल । ज्याझ्वःया गुणस्तरय् ध्यान मब्यूबलय् रेडियोप्रति वितृष्णा ब्वलन । रेडियों स्थानीय मुद्दा ल्ह्वने मफूगु पत्रकार महासंघ चितवनया नायः खतिवडाया अनुभव खः ।

अथेहे, राजधानीया रेडियो सञ्जालया ज्याझ्वः थ्वयेकेगु, स्वनिगःपाखें हे उत्पादित ज्याझ्वः व बुखँ न्ह्यब्वयेगु याःबलय् रेडियोया स्थानीयताय् न्ह्यसः चिं ब्वलंगु दु । समुदायया नितिं धकाः चायेकूगु सामुदायिक रेडियो व्यावसायिक रेडियो थें स्थानीयबासीयात त्वःताः राष्ट्रिय ज्याझ्वलय् ध्यान बिइगु यानाच्वंगु दु ।

बि.सं. २०६५ चैत्र १९ गते पलिस्था जूगु रेडियो त्रिवेणीया स्टेशन म्यानेजर अर्जुन अधिकारी गां क्षेत्रय् रेडियोया न्यनामिपिं अप्वःगु व शहरय् म्हो जूगु धयादी । रेडियो प्रत्यक्ष जनतालिसे स्वानाच्वंगुलिं महत्व धाःसा आःतक नं दूगु वय्कःया धापू खः ।

वय्कलं “ज्याझ्वःत ल्वाकीगु याःबलय् रेडियोया थःगु म्हसीका छु खः ? सुयागु नं मदु, छम्हेस्यां ज्याझ्वः यात, मेम्हेस्यां उज्वःगु हे ज्याझ्वः हइ” धकाः अधिकारीं धयादी । वय्कलं ज्याझ्वः तकं स्वनिगःमुखी जूगु व जनशक्ति अभावं गुणस्तरीयता कमजोर जूगु टिप्पणी यानादी ।

अझ नं भाषाशैली, स्थानीय भाषा व शुद्ध उच्चारणय् तकं रेडियोय् तःधंगु समस्या जुयाच्वंगु दु । न्हूगु पुस्तां रेडियो कःघायेमाःगु अवस्था वःगुलिं नं गुणस्तरय् कमजोर जूगु खः नायः खतिवडां धयादी ।

थःपिन्सं रेडियोया गुणस्तरय् छुं कञ्जुस्याईं मयानागु धयादी रेडियो सिनर्जीया स्टेशन म्यानेजर प्रधानं ।

रेडियो त्रिवेणीया स्टेशन म्यानेजर अर्जुन अधिकारीं विज्ञापन बजारय् तकं रेडियोया अस्वस्थ धेंधेंबल्ला जुयाच्वंगु खँय् बः बियादी ।

नेपालय् २००३ सालय् रेडियो प्रसारण न्ह्याःगु खः । बि.सं. २०५२ सालनिसें धाःसा एफएम रेडियो सुरु जूगु खः ।

स्पेनया प्रस्तावय् युनेस्कोया ३६ क्वःगु सम्मेलनं पारित यायेधुंकाः हरेक दँ फेब्रुअरी १३ तारिखया दिनय् रेडियो दिवस न्यायेकाः वयाच्वंगु खः ।

Categorized in राष्ट्रिय