nepal life

थौं बुधवाः देउवाया राजीनामा, निर्वाचन आयोगया भरय् !

नेवा: अनलाइन न्युज | २०७४ फाल्गुण २, बुधबार ११:१४:३३

प्रधानमन्त्री शेरबहादुर देउवां बुधवाः राजीनामा बिइगु तयारी याःगु दु । तर, वय्कःया राजीनामा निर्वाचन आयोगय् निर्भर जुइ ।

निर्वाचन आयोगं बुधवाः प्रतिनिधिसभा निर्वाचनया लिच्वः राष्ट्रपतियात लःल्हाःसा बुधवाः हे राजीनामा बिइगु देउवाया तयारी दु ।

नेपाली कांग्रेस केन्द्रीय ज्याकुथिया मुख्य सचिव कृष्णप्रसाद पौडेलं धयादी, “निर्वाचन आयोगं राष्ट्रपति न्ह्यःने लिच्वः लःल्हायेखतं प्रधानमन्त्रीया राजीनामा वइ ।”

मुख्य सचिव पौडेलं धयादी, “निर्वाचन क्वचायेकेगु दायित्व पूवंके धुंकूगुलिं प्रधानमन्त्री शेरबहादुर देउवा आः १ मिनेट नं पदय् च्वनीमखु । तर न्हापां निर्वाचन आयोगं लिच्वः लःल्हायेमाल ।”

गुकथं यानाच्वंगु दु निर्वाचन आयोगं तयारी ?

निर्वाचन आयोगं नं बुधवाः ज्याकुथि इलय् हे निर्वाचन लिच्वः राष्ट्रपतियात लःल्हायेगु तयारी याःगु दु । उकिया नितिं राष्ट्रपतियाके ई नं माग याःगु आयोगया छम्ह पदाधिकारीं जानकारी ब्यूगु दु ।

तर, दलतय्त समानुपातिक सांसदया नां धलः सचेयानाः बुझेयायेत निर्वाचन आयोगं ब्यूग थप निन्हुया ईया बुधवाः लिपांगु दिं खः । उकिं आयोगं दलतपाखें संशोधित नां धलः वइगु पियाच्वंगु दु ।

कांग्रेस, माओवादी व राजपां थ्वसिबें न्ह्यः लःल्हाःगु धलखय् प्राथमिकता क्रम मिलेमजुइ धुंकाः सचेयानाः हाकनं लःल्हायेत आयोगं बुधवाः सनिलया ५ ता ईतकया ई ब्यूगु दु । राजपां मंगलवा हे संशोधित नां धलः लःल्हाःसां नं कांग्रेस व माओवादीं लःल्हाःगु मदुनि ।

निर्वाचन आयोगया छम्ह पदाधिकारीं धयादी, “जिमिसं निगू दलया नां धलः पियाच्वनागु दु । इमिसं गुलि याकनं नां बुझेयाइ, उलि हे याकनं राष्ट्रपति न्ह्यःने पेस यायेगु जुइ । उकिया नितिं ई नं फ्वनेधुनागु दु । छम्ह निम्हेसिगु नां जक संशोधन यायेमाःगु दु, मेगु ला फुक्क रेडी यानाः च्वनेधुनागु दु ।”

Categorized in राजनीति