nepal life

थौं नेपालं त्याके हे माःगु दबाब, डिभिजिन–२ स नेपाः व क्यानाडा म्हितीगु

नेवा: अनलाइन न्युज | २०७४ फाल्गुण २, बुधबार १२:२९:२५

आईसीसी विश्व क्रिकेट लिग डिभिजन–२ अन्तर्गत समूह चरणया लिपांगु कासाय् नेपाः व क्यानाडा दथुइ थौं बुधवाः धेंधेंबल्ला जुइत्यंगु दु । विश्वकप छनोट कासा म्हितेगु नितिं नेपाःयात त्याके हे माःगु दबाब दु ।

कासा नेपाल ई कथं १ः१५ ता इलय् सुरु जुइ ।

न्हापांगु कासाय् नामिबियायात रोमाञ्चक जित पिकाःगु नेपालं निगूगु कासाय् ओमानलिसे अप्रत्यासित हार ब्यहोरे यायेमाःगु खः । स्वंगूगु कासाय् यूएईयात बुकेधुंकाः विश्वकप छनोटया सम्भावना कायम हे जूगु खः । तर, क्यानाडायात बुके हे माःगु बाध्यता ब्वलंगु दु ।

आः अंक तालिकाया शीर्ष स्वंगू टिमया समान ६–६ अंक दुसा यूएईया ४ अंक दु । थौं बुधवाः नेपालं क्यानाडालिसे म्हितीबलय् घरेलु पुचलं नामिबियां यूएईया सामना याइ । यदि नेपालं त्याकल धाःसा तप्यंक हे फाइनललिसें विश्वकप छनोटय् थाय् पक्का याइ ।

यदि नेपाः क्यानाडालिसे बुत धाःसा लगभग मैदानं पिहाँ वइगु निश्चित दु । छगू अवस्थाय् जक नेट रनरेट स्वयेमालीगु जुइ ।

यदि नेपाल क्यानाडालिसे बुत व यूएईं नामिबियायात बुकल धाःसा स्वंगू पुचःया समान ६–६ अंक जुइ व नेटरन रेटया आधारय् नेपाः, नामिबिया व यूएईमध्य छगू पुचलं फाइनललिसें विश्वकप छनोटय् थाय् दयेकी ।

तर, स्वंगुलिं कासाय् म्हो जक अन्तरं त्याकूगु नेपाःया रनरेट दकले म्हो दु । थुज्वःगु अवस्थाय् नेपाःयात नेट रनरेटं साथ मबिइफु । उकिं ढुक्क जुइत विश्वकप छनोटय् थाय् दयेकेत क्यानाडायात मबुकुसे  सुख हे मदु ।

Categorized in कासा