nepal life

थौं नारायणगोपाल मदूगु २७ दँ दत (नेवाः म्ये न्यनादिसँ)

नेवा: अनलाइन न्युज – ललेन्द्र शाक्य | २०७४ मङ्सिर १९, मंगलबार १५:५०:३८

बि.सं. १९९६ सालय् येँया किलागलय् जन्म जुयादीम्ह स्वरसम्राट नारायणगोपाल गुरुवाचार्य ५१ दँया उमेरय् बि.सं. २०४७ साल मंसीर १९ गते थौंया दिं मदूगु खः । वय्कः मधुमेह ल्वचं कयाः मदुगु खः ।

नारायणगोपालयात स्वरसम्राटया उपाधिं सम्मान यात सरकारं वय्कः मदयेधुंकाः । गुगु नं देसय् न्ह्याग्गु नं विधाय् सरकारं सम्राट घोषणा याइ, वयात राज्यकोषपाखें फुक्क भत्ता सुविधा बिइमालीगु जूगुलिं छम्ह नेवाः जूगु हुनिं नारायणगोपाल गुरुवाचार्ययात मृत्यु लिपा जक सरकारं स्वरसम्राटया उपाधि छगू कथं हेपेयानाः लःल्हाःगु खः धकाः संगीत विश्लेषकपिन्सं धायेगु याः ।

खय्तला, जनस्तरं नारायणगोपाल म्वानाच्वंगु इलय् हे स्वरसम्राटया उपाधि ब्यूगु खःसा, न्यनेदू कथं छगू इलय् विराटनगरया छगू सांगितिक ज्याझ्वलय् नारायणगोपालयात स्वरसम्राट नारायणगोपाल दबुली झायेत्यंगु दु धकाः धाःबलय् नारायणगोपालं अनं दबुलिइ जि स्वरसम्राट जुइ लायक मजुनि धकाः उद्घोष याःगु धैगु खँ नं न्यनेदु ।

तर सरकार जनस्तरं स्वरसम्राट उपाधि बिइधुंकूसां नं मौन च्वनाबिल । मदये धुंकाः तिनिं जनस्तरं बियातःगु उपाधियात नालाः नारायणगोपाल गुरुवाचार्ययात स्वरसम्राट उपाधि हेपाहा प्रवृत्तिं बिल धैगु खँ न्ययेदु ।

नारायणगोपाल छम्ह तबलाबादक खः । उगु इलय् नांजाःपिं गायकपिं गोल्डेन भ्वाइस अफ नेपाल प्रेमध्वज प्रधानलिसें माणिकरत्न स्थापितपिन्सं म्ये हालिबलय् तबला थाइम्ह तबला बादक खः नारायणगोपाल ।

नारायणगोपालया सः अतिकं बांलाःगुलिं प्रेमध्वज व माणिकरत्नं ‘नारायण, छं नं म्ये हाः, सः बांलाः, रेडियो नेपालय् भ्वाइस टेष्ट ब्यु’ धकाः हौसला बिइधुंकाः नारायणगोपालं रेडियो नेपालय् भ्वाइस टेष्ट बियाः पास याःगु व उबलेनिसें रेडियो नेपालय् म्ये हालेगु न्ह्याकूगु खः धकाः गोल्डेन भ्वाइस अफ नेपाल प्रेमध्वज प्रधानं जानकारी बियादीगु दु ।

स्वरसम्राट नारायणगोपालया समकालीन झी जनकवि दुर्गालाल श्रेष्ठ नं छम्ह खः । मचांनिसें नापं म्हितावःपिं त्वाःया स्याःन्याःपिं पासापिं । न्ह्याथाय् वंसां नापं, अय्लाः त्वंवंसां नापं । तर, जनकवि दुर्गालालया म्ये नारायणगोपालं छाय् महाल जुइ ? नारायणगोपालं नेपालभाषाया महाकवि गिरिजाप्रसाद जोशीया रचनाय् थःम्हं तुं संगीत तयाः म्ये हालादीगु दु नेपालभाषाया ।

नेपालभाषाया छुं छुं म्येत नारायणगोपालं क्वथाय् हार्मोनियम थानाः हालाः रिकर्ड यानाथकूगु दु ।

नारायणगोपालं थ्यंमथ्यं १३६ पु म्ये हालातःगु दुधकाः तथ्यांक पिथनातःगु दु ।

(थन क्लीक यानाः स्वरसम्राट नारायणगोपाल गुरुवाचार्यं हालादीगु नेवाः म्ये न्यनादिसँ)

(म्ये ग्वाहालि ः शान्तराज शाक्यया फेसबुकपाखें ल्ह्यया)

Categorized in कला