nepal life

थौं जनवहाःद्यःया न्हवं

पौष शुक्ल पक्ष अष्टमीया दिं आर्यावलोकितेश्वर सेतो मच्छिन्द्रनाथ जनबहाःद्यः करुणामयया महास्नान अर्थात् न्हवंया नितिं सप्तमिया दिं सुथ न्हापां प्यता ईपाखे द्यःगुरु, बेताजु गुरुजु (सबल बहाःया शाश्वत बज्रया सन्तानपिं) व जनबहाःया थकाली गुरुजुपिं व सर्वसंघ उपासक उपासिकापिं ततःग्वःगु ग्वःजा व पुजाया हलंज्वलं ज्वनाः नवघट तयाः पुजाया नितिं नीलः कायेत भःचाखुसि शान्तितीर्थय् वनेगु याइ ।

वधुंकाः नवघटय् नीलः तयाः चान्हय् १२ ता इलय् स्तोत्रपाठ यानाः जनबहालय् हे लिहाँ वइ । बहालय् थ्यनेधुंकाः कलश दुने करुणामयया जीवन्यास यानाः साधना यायेगु याइ । करुणामययात देगःपाखें पिने हयाः जवय् छगू कुनय् विराजमान याकी । कन्हय् कुन्हु अष्टमीया दिं न्हवं लुइत नेमकुल समुदायं करुणामययात काः वइ ।

न्हिनय् करुणामययात देगःया न्ह्यःने जवपाखे मण्डपय् विराजमान याकी । न्हवंया दर्शन याकेगु नितिं कुमारीयात नं बिज्याकी । धाइ, उगु न्हवं पर्व अवलोकन यायेत आकाशमार्गपाखें ३३ कोटी द्यःपिं गथेकि, गन्धर्व, किन्नर, यक्षगणपिं स्वयेत वइ । अथेहे न्हवं जुइबलय् पँयताः व मेमेगु बाजात थ्वयेकी ।

न्हवं याकेन्ह्यः करुणामयया म्हय् तिइकातःगु फुक्क तिसा वसः त्वकी । छन्हु न्ह्यः भःचाखुसिपाखें हःगु जवखव तयातइगु लीया घःलय् पवित्र जलं गुरुजुपाखें मन्त्रोचारण यानाः निम्ह विहारया थकालीपिंपाखें करुणामययात न्हवं यानाः बिज्याइ ।

छुं ई लिपा हाकनं क्वाःलखं म्वः ल्हुकी । न्हवंया इलय् स्वःवःपिं सकल भक्तजनपिन्त न्हवंया पवित्र जल छ्वाकी । न्हवं धुंकाः लोकेश्वरया मूर्तिइ कापतं भुनाः देगः चाःहीकाः देगः दुने विराजामान याकी यंकी ।

लोकेश्वरया मूर्ति देगः दुने यथास्थानय् तयेधुंकाः सर्वसंघ मुनाः ‘क्वकायेगु’ धकाः साखः–बजि प्यंगू कवःया गुथ्याः पुजारीपिं दथुइ ब्व तइ । उगु साखः व बजि थःथिति दाजुकिजा फुकीपिन्त प्रसाद कथं इनाबिइ । थ्व साखः व बजि इनेगु परम्परा सुयागु सुयागु पाः च्वनेगु धैगु खँया निश्चित जुइ ।

‘पोहेला पाः’ धकाः उगु दिं पाः हिलेगु ज्या जुइ । सर्वसंघय् पाः च्वनीपिनिगु थुकथं कालबिल जुइ । न्हवंया ज्या क्वचायेधुंकाः उकिया कन्हय् कुन्हु नवमीया दिंनिसें लोकेश्वरया मूर्तियात मच्छिन्द्रबहालया उत्तरपाखे निभाः जः दूगु थासय् च्वंगु ल्वहँया पदमाशनय् तयाः निभाः पाकेगु याइ ।

मूर्तिइ रंगरोगन यायेगु ज्याय् गुथिया पुं (चित्रकार)पिन्सं ग्वाहालि याइ । पुन्हीया छन्हु न्ह्यः ‘लँपुली छायेगु’ धकाः करुणामय व तारापिनिगु मूर्तिइ रंगरोगन यायेगु ज्या क्वचायेकेगु याइ । चित्रकारपिनिगु सल्लाह कयाः पुजारीं रंगपाखें समाः यायेगु याइ ।

पुन्हीया दिं ‘द्यः गुरुजु’, बेताजु, न्याम्ह थकाली व स्वम्ह थकालीया जहानपिं थकालीनकिं व जमोमी (किसान ज्यापु) च्वनाः होमादि यानाः दशकर्म विधि कथं चापुजा यायेगु याइ । थथे दशकर्म विधि कथं संस्कार याइबलय् करुणामययात मिजं व मिसायात याइगु प्रतिष्ठा संस्कार याइ । गथेकि, उपनयन व इही इत्यादी ।

मूतिइ दृष्टिदान यानाः बाह्य पूजाया समाप्ति लिपा लोकेश्वरया मूर्तियात देगः दुने यंकाः विराजमान याकी । आगमय् च्वंगु ‘दिगी छेँय्’ बज्राचार्यपिंपाखें बज्रयान विधि कथं अभ्यन्तर पुजा याइ । गुह्यपुजा याइबलय् अवलोकितेश्वरयात हेरुकया प्रतीक कथं कायेगु याइ ।

बाह्य रुपं अवलोकितेश्वर करुणाया प्रतीक खः । उकिं करुणामयया दशकर्म पुजा व मेमेगु पुजाया प्रसाद सकल गुथ्याःया छेँजलय् ‘सिसापालु नकेगु’ धकाः चाकु, चि, साखः, पालु, लवं ल्वाकज्याःगु प्रसाद इनेगु याइ । लोकेश्वरयात प्रतिष्ठा पुजा क्वचायेधुंकाः ‘थाय भू’इ तःजिगु भ्वय् ब्वः तयेगु याइ ।