nepal life

थौं कीर्तिपुर दशैं महोत्सवया उलेज्या मेयर रमेश महर्जनया ल्हाःतं

नेवा: अनलाइन न्युज – ललेन्द्र शाक्य | २०७४ भाद्र २८, बुधबार १२:४८:०२

दँय् दसं न्यायेकाः वयाच्वंगु कीर्तिपुर दशैं महोत्सव थुगुसी नं तःजिक न्यायेकेगु तयारी याःगु दु ।

थुगुसीया स्वक्वःगु कीर्तिपुर दशैं महोत्सव थौं भाद्र २८ गते बुधवाः उलेज्या जुइगु जूगु दुसा थुगु महोत्सव असोज ९ गतेतक न्ह्याइगु जूगु दु ।

किपू नगरपालिकाया प्रमुख रमेश महर्जनया ल्हाःतं उलेज्या जुइगु थौं बुधवाःया ज्याझ्वलय् उपमेयरलिसें किपू नगरया फुक्क वडाध्यक्षलिसें जनप्रतिनिधिपिं पाहाँ कथं झाइगु जूगु दु ।

राइज म्यूजिक व औद्योगिक शान्ति नेपाल संस्थाया ग्वसालय् १५ न्हुतक न्ह्याइगु कीर्तिपुर दशैं महोत्सवया नितिं किपूया नयाँ बजार क्लब, राजकमल महर्जन, शशिर महर्जन, बाघभैरव टेलिभिजन, तेजस्वी कला केन्द्र, अमीर कला केन्द्रपिनिगु विशेष ग्वाहालिं उगु महोत्सव न्ह्यायेत्यंगु खः ।

न्हिथं सुथय् १० ता इलंनिसें सनिलया ७ ता ईतक न्ह्याइगु उगु महोत्सव किपूया १० वडा न्हूबजारय् च्वंगु बसपार्क फुटबल ग्राउण्डय् जुइत्यंगु खः ।

ग्वसाः खलकं ब्यूगु जानकारी कथं थौं भाद्र २८ गते उलेज्या लिपा थीथी सांस्कृतिक ज्याझ्वःया लिसें नांजाःम्ह म्येहालामि हेमन्त रानालिसें आपालं चर्चित कलाकारपिनिगु सांगितिक कन्सर्ट जुइगु ज्याझ्वः नं तयातःगु दु ।

उगु महोत्सवय् दुहाँ वनेत निःशुल्क व्यवस्था यानातःगु दु ।

Categorized in स्थानिय-समाज