nepal life

थासं थासय् विप्लव माओवादीया कार्यकर्तापिं ज्वन

नेवा: अनलाइन न्युज | २०७४ कार्तिक २७, सोमबार १६:४७:०६

  • पोखराय् १२ म्ह विप्लव माओवादी कार्यकर्ता गिरफ्तार
  • ताप्लेजुङ्य् ८ म्ह विप्लव माओवादी कार्यकर्ता गिरफ्तार
  • रोल्पाय् नं विप्लव कार्यकर्ता गिरफ्तार

प्रतिनिधिसभा व प्रदेशसभा निर्वाचनया उम्मेदवारपिन्त देसया थीथी थासय् आक्रमण यायेगु ज्या न्ह्याकेधुंकाः जिल्ला प्रहरी ज्याकुथि, कास्कीं नेपाल कम्युनिष्ट पार्टी विप्लव पुचःया १२ म्ह कार्यकर्ता गिरफ्तार याःगु दु ।

मंसीर २१ गते जुइगु निर्वाचनयात शान्तिपूर्ण तरिकां क्वचायेकेत उच्छृंखल गतिविधिइ दुथ्याइगु आशंकां मेमेपिनिगु नं मालेगु ज्या जुयाच्वंगु प्रहरीं जानकारी ब्यूगु दु ।

अथेहे निर्वाचन सुरक्षायात ध्यानय् तयाः जिल्ला प्रहरी ज्याकुथि ताप्लेजुङं विप्लव नेतृत्वया नेपाल कम्युनिष्ट पार्टीया ८ म्ह कार्यकर्तापिन्त गिरफ्तार याःगु दु ।

ताप्लेजुङया प्रहरी प्रमुख डिएसपी नायव उपरीक्षक ज्ञानेन्द्रबहादुर बस्नेतया कथं गिरफ्तारीइ लाःपिं मेची अञ्चल ब्युरो दुजः सकलल लिम्बु, जिल्ला सचिवालय दुजः राजु दास, जिल्ला दुजः व विद्यार्थी नायः गणेश कार्की ढोली लाःगु खः ।

अथेहे, जिल्ला दुज ध्रुव मादेन, जिल्ला जनपरिषद उपप्रमुख राकेश दाहाल, जन स्वयमसेवकया जिल्ला दांभरी पूर्ण थलङ व जिल्ला दुजः प्रेमलाल चौहान गिरफ्तारीइ लाःगु खः ।

थुखे नेकपाया जिल्ला इञ्चार्ज आशिषं मेपिं निम्ह कार्यकर्तापिं पेम्बा शेर्पा व सुरेन्द्र कार्कीयात नं प्रहरीं गिरफ्तार याःगु खँ धाःगु दु ।

इञ्चार्ज आशिषं प्रहरीं नियन्त्रणय् कयाः थःपिं कार्यकर्ता विनासर्त मत्वःतल धाःसा निर्वाचनय् ब्वति काइपिं उम्मेदवारपिन्त नं नियन्त्रणय् कायेगु धाःगु दु ।

थ्वहे झ्वलय् रोल्पाय् नं विप्लव नेतृत्वया नेपाल कम्युनिष्ट पार्टीया मेम्ह छम्ह कार्यकर्तायात ज्वंगु दु ।

वंगु कार्तिक २२ गते ज्वंपिं नेतातय्त त्वःतेत माग यासें सोमवाः रोल्पा बन्दया आह्वान याःगु इलय् प्रहरीं मेम्ह छम्ह कार्यकर्ता गिरफ्तार याःगु दु ।

प्रहरीं जिल्लाया लुङ्ग्री गाउँपालिका–१ पाखें जिल्ला दुजः टाइगर धाइम्ह धनबहादुर खत्रीयात गिरफ्तार याःगु दु ।

प्रतिनिधिसभा व प्रदेशसभा दुजःया चुनाव लिक्क वयाच्वंगु इलय् विप्लव कार्यकर्तापिन्सं निर्वाचन विरोधी गतिविधि न्ह्याके धुंकाः प्रहरीं निगरानी अप्वयेकूगु खः ।

थ्वसिबें न्ह्यः प्रहरीं जिल्ला इञ्चार्ज जागृति व सेक्रेटरी प्रयासयात गिरफ्तार यायेधुंकूगु दु ।

Categorized in राजनीति