nepal life

थः फसे जुइगु ग्याःचिकुं सशस्त्र मू ज्याकुथिइ मिँ तल हवल्दार श्रेष्ठं

नेवा: अनलाइन न्युज | २०७४ पौष १८, मंगलबार १३:३०:४७

न्हूगु सरकार दयेकीगु अवस्था जुयाच्वंगु इलय् सशस्त्र प्रहरी दुने जुइगु संस्थागत भ्रष्टाचारया भ्वँत नियोजित रुपं नष्ट यायेगु ज्या जूगु दु ।

प्यम्ह आइजीपिपिं भ्रष्टाचारया मुद्दा फयाच्वंगु अवस्थाय् प्रमाण नष्ट यायेत सशस्त्र प्रहरी बलया मू ज्याकुथिइ योजनाबद्ध रुपं मिँ तयाब्यूगु दु ।

सशस्त्र प्रहरीया डिएसपीपिं होम ज्ञवाली, युवराज आचार्य लिसेंया संलग्नता व प्यम्ह आइजीपीया सल्लाहपाखें प्रमाण नष्ट यायेगु ज्या जूगु स्रोतं धाःगु दु । उगु प्रकरणय् सई हुमबहादुर थापा व हवल्दार रामकृष्ण श्रेष्ठ गिरफ्तारीइ लायेधुंकूगु दु ।

सशस्त्रय् ढुवानीया आवरणय् जूगु अनियमितताय् प्यम्ह पूर्व आइजीपीं अख्तियार दुरुपयोग अनुसन्धान आयोगं दर्ता याःगु मुद्दा विशेष अदालतय् विचाराधीन अवस्थाय् दु ।

प्रमाण नष्ट यायेत मिँ तःगु द्वपनय् हवल्दार श्रेष्ठयात गिरफ्तार यानाः अनुसन्धान यानाच्वंगु महानगरीय प्रहरी अपराध महाशाखां श्रेष्ठलिसे लेखा शाखाय् ज्या यानाच्वंम्ह सई थापाया तकं संलग्ना दूगु खनेदयेधुंकाः वयात ज्वनाः अनुसन्धान न्ह्याकूगु खः ।

अन सुरुनिसें हे ज्या यानाच्वंम्ह ज्ञवाली व आचार्य नं अनुसन्धानया झ्वलय् दूगु प्रहरीं दाबी याःगु दु । उगु विषयस गृहमन्त्रायं नं छानविन यानाच्वंगु जानकारी ब्यूगु दु ।

अनुसन्धानया झ्वलय् महाशाखां ढुवानी बापतया भुक्तानी रकमय् अनियमितता याःगु धासें अख्तियार दुरुपयोग अनुसन्धान आयोगं अनुसन्धान न्ह्यःने यंकेधुंकाः हवल्दार श्रेष्ठं ढुवानी भुक्तानीसम्बन्धी फाइल स्टोर रुमय् पेट्रोल छ्वाकाः मिँ तःगु जानकारी ब्यूगु दु ।

अनुसन्धान कथं आयोगं बयान कयाः ढुवानी सम्बन्धी भुक्तानीया फाइल माग यायेधुंकाः थः फसे जुइगु जुइधुंकाः हवल्दार श्रेष्ठं थःम्हं हे मिँ तःगु खः ।

महाशाखां मिँ च्याःगुलि मिँ पूगु हवल्दार श्रेष्ठया ल्हाः, कापः व वया बयानयात प्रमाण दयेकूगु दु । हवल्दार श्रेष्ठ थापा मातहतया कर्मचारी खः । ढुवानी भुक्तानी बापतया प्रमाण नष्ट याःबलय् थापायात तकं फाइदा जूवंगु खः । पुस ३ गते सशस्त्र बलया हलचोकय् च्वंगु हेडक्वाटरया खेलमैदान लिक्कया स्टोर रुमय् मिँ च्याःगु खः । प्रारम्भय् विद्युत सर्ट जुयाः मिँ च्याःगु धाःगु खःसां नं घटना शंकास्पद धासें सशस्त्रं एआइजी प्रेम शाहीया नेतृत्वय् छानविन समिति नीस्वंगु खः ।

पूर्व आइजीपी कोषराज वन्त, सनतकुमार बस्नेत, शैलेन्द्रकुमार श्रेष्ठ व बासुदेव ओली लिसेंया सशस्त्रया दर्जनौं कर्मचारी ढुवानी अनियमितताय् धरौर्टी दु ।

हवल्दार श्रेष्ठं च्याकूगु फाइलय् इमिगु कार्यकालय् जूगुु ढुवान भुक्तानी सम्बन्धी प्रमाण दूगु वा मदूगु बारे सुनानं आधिकारिक धारणा सार्वजनिक याःगु मदु । अख्तियारं ढुवानीया आवरणय् जूगु भ्रष्टाचारया फाइल औपचारिक रुपं चायेकूबलय् २०७२ पुस २ गते वन्त निलम्बनय् लाःगु खः । बयानया झ्वलय् वं पूर्व आइजीपी बस्नेत, ओली व श्रेष्ठया नां तकं पोल खोलेयाये धुंकाः अख्तियारं फुक्कसित विशेषय् मुद्दा दायर याःगु खः ।

इमिसं लेखा शाखा व भण्डारया कर्मचारीपिन्त परिचालन यानाः ढुवानी सम्बन्धी बिल थःपिन्सं हे छापे याःगु तकं सीदूगु दु ।

अख्तियारं वन्तविरुद्ध ६ करोड, बस्नेतविरुद्ध ८ करोड, ओलीविरुद्ध १ करोड १४ लख, श्रेष्ठया नामय् १ करोडया बिगो माग दाबी यायेधुंकाः इपिं धरौटी पुलाः मुक्त जूगु खः ।

सशस्त्रया वसः व बन्दोबस्तीया सामान ढुवानीया नितिं बलपाखें करोडौं रकम ढुवानीइ खर्च जुइगु जुयाच्वंगु खः । अख्तियारय् उजुरी लायेधुंकाः अनुसन्धान जूबलय् ढुवानी भुक्तान वापतया बिल सशस्त्रया तत्कालीन प्रमुखपिन्सं नक्कली दयेकाः थःपिन्सं हे कायेगु याःगु खः । वन्तपाखें न्ह्याःगु अनुसन्धान वसिबें न्ह्यःया स्वम्ह पूर्व प्रमुखतक थ्यंबलय् सशस्त्रया फुक्क आइजीपीं थःगु कार्यकालय् ढुवानीया आवरणय् भ्रष्टाचार याःगु खँ सीदूगु खः ।

ओलीं थःगु कार्यकालय् संगठनय् ज्या हे यानाः मच्वंम्ह कर्मचारीया नामय् ढुवानी प्रयोजनया नितिं धासें १ करोड १४ लख पेस्की पिकाःगु  खँ सीदूगु दु । ९ महिना जक आइजीपी जूम्ह श्रेष्ठया पालय् जूगु भुक्तानी तकं अनुसन्धानय् सालाः यंकूबलय् वलिसें तत्कालीन लेखा प्रमुख प्रहरी निरीक्षक तकमान महरा, भण्डार शाखा प्रमुख सई रामचन्द्र श्रेष्ठ व अदिति ट्रान्सपोर्टया संचालक भरतकुमार थापातकं लाःगु दु ।

डिएसपी सुमनजंग थापा, रामकृष्ण महर्जन व प्रहरी निरीक्षक विनयबहादुर थापातकं भ्रष्टाचारय् दुने लाःगु खः ।

प्रहरी निरीक्षकपिं बिनबहादुर थापा, मनुहीरा महत, शिवकुमार अधिकारी, सई देवेन्द्रकुमार श्रेष्ठ, नीलबहादुर श्रेष्ठ व लेखबहादुर श्रेष्ठ नं उगु काण्डय् दुने लाःगु दु ।

(जनप्रहार वाःपौ पाखें साभार)

Categorized in पत्रपत्रिका