nepal life

थँबही देगः गुथि छेँ शिलापत्र उलेज्या

नेवा: अनलाइन न्युज | २०७४ फाल्गुण १, मंगलबार १७:३५:४४

येँया थँबही त्वाःया चिंकतय् च्वंगु गुथि छेँ उलेज्या सोमवाः जुल ।

गुथि छेँया शिलापत्र सानु महर्जन व आशानारां महर्जनं मंकाः कथं उलेज्या यानादीगु खः ।

शान्ता महर्जनं ज्याझ्वः न्ह्याकादीगु उगु गुथि छेँ उलेज्या ज्याझ्वलय् जग्गा दातापिन्सं देगः गुथियात लालपुर्जा लःल्हाःगु खः ।

न्याम्हेसिनं जग्गा दान बियाः उगु गुथि छेँ निर्माण याःगु खः । उगु ज्याझ्वलय् जग्गा दातापिन्त ससम्मान यासें दसिपौं लः ल्हागु खः । उगु गुथि छेँ निर्माणया नितिं देव महर्जन, जनमाया महर्जन, धनमाया महर्जन, न्हुच्छेमाया महर्जन, मोतिमाया महर्जनपिन्सं जग्गा दान यानादीगु खः ।

पुलांम्ह वडा सदस्य पुष्पमान डंगोलं न्हापा जूसा मेमेगु थासय् देपुजा हनेबलय् तसकं मछिनाच्वंगु खँ न्ह्यथंसें वय्कलं गुथि छेँ निर्माण जुयाः आः छुं भचा जूसां नं ज्याछिंगु दु धकाः नुगः खँ प्वंकादीगु खः । अथेहे उगु गुथि छेँ उलेज्या ज्याझ्वः मचानारायण महर्जनं क्वचायेकादीगु खः  ।

–गोपालदास श्रेष्ठ

Categorized in स्थानिय-समाज