nepal life

तेजस्वी कला केन्द्रया इन्टर स्कुल डान्स कम्पिटिशन २०७४ क्वचाल

नेवा: अनलाइन न्युज – ललेन्द्र शाक्य | २०७४ कार्तिक २९, बुधबार १०:३२:४५

किपूया तेजस्वी कला केन्द्र एण्ड मिडिया व मनकामना म्यूजिक क्रियशनं मंकाः रुपं ग्वसाः ग्वःगु इन्टर स्कुल डान्स कम्पिटिशन २०७४ या न्हापांगु संस्करण क्वचाल । छुं दिं न्ह्यः ग्राण्ड फिनाले यानाः उगु ज्याझ्वः क्वचायेकूगु खः ।

नेपाली कांग्रेस येँया छ्याञ्जे राजकुमार नकःमिया ल्हाःतं त्वाःदेवाय् मत च्याकाः उगु ज्याझ्वःया उलेज्या जूगु खः । किपूया त्रिभुवन विश्वविद्यालयया अडिटोरियम हलय् जूगु उगु ज्याझ्वलय् थीथी पार्टीया प्रतिनिधि, पदाधिकारी, कलकार व संचारकःमिलिसें थीथी स्कुलया प्रधानाध्यापक, प्राध्यापक, विद्यार्थी लिसें अभिभावकपिनिगु आपालं उपस्थिति दूगु खः ।

उगु ज्याझ्वःया निर्णायक मण्डलय् बरिष्ठ नृत्य निर्देशक महेश्वर महर्जन, भुवन श्रेष्ठ व पद्मकन्या क्याम्पसया प्रोफेर तकं जुयादीम्ह तारा मानन्धर च्वनादीगु खः ।

ज्याझ्वः सुरुइ २५ म्ह फाइनलिष्टपिनिगु न्ह्याइपुक्क धेंधेंबल्ला जूगु खःसा वयां लिपा १५ म्ह ल्यःगु खः । अथेहे उगु टप १५ म्ह पाखें दकलें लिपा टप ३ या घोषणा याःगु खः ।

लिसें २५ म्ह फाइनलिष्टपाखें थीथी १५ गू विधाय् अवार्ड लःल्हाःगु खःसा छगू विधायात धाःसा सरप्राइजया रुपं बेष्ट गार्जेनया अवार्ड लःल्हाःगु खः ।

सोनिया केसी, आकृति स्याङतान, एञ्जिला वि.क. छसिंकथं न्हाप, ल्यू व लियांल्यू लाःगु खःसा संगीता बि.क., एलिजा महर्जन, रिया महर्जन, जेनिसा चौधरी, प्रियांसु खड्का, लिजा महर्जन, उत्साह महर्जन, रिदिसा आचार्य, एञ्जिला बि.क., सुस्मिता बडु, निर्जला महर्जन, कविना रोक्का, गरिमा पौडेल, शान्ति रुपाखेती, सिनेरिया बज्राचार्यपिन्सं थीथी १५ गू विधाय् अवार्ड त्याकादीगु खः । अथेहे, बिरेन्द्र चौधरीं धाःसा बेष्ट गार्जेनया अवार्ड त्याकूगु खः ।

मूपाहाँ, पाहाँ, निर्णायक मण्डल व ग्वसाः खलः लिसें ल्यू ग्वसाः खलः पुचःपाखें थीथी विधाया सिरपाः लःल्हाःगु खःसा मूपाहाँ, पाहाँ, कलाकार, संचारकःमि लिसें स्कुलयात मतिनाया चिं लःल्हाःगु खः ।

थ्वहे झ्वलय् ज्याझ्वः क्वचायेकेगु झ्वलय् सभापतिपाखें फुक्कसित सुभाय देछासें आःया खुला लिपा थ्वहे कासाया निगूगु संस्करण नं जुइगु खँ तेजस्वी कला केन्द्रया नायः सुमनकुमार श्रेष्ठं जानकारी बियादीगु खः ।

Categorized in कला