nepal life

डा. केसीया समर्थनय् अमेरिकापाखें नं ऐक्यबद्धता

नेवा: अनलाइन न्युज | २०७४ पौष २६, बुधबार १७:०२:२३

प्रधानन्यायाधीश गोपाल पराजुलीविरुद्ध अभिव्यक्ति बिइधुंकाः गिरफ्तारीइ लाःम्ह प्रा.डा. गोविन्द केसीया अभियानय् अमेरिकाय् च्वंगु थीथी नेपाली संघसंस्थां ऐक्यबद्धता प्वंकूगु दु ।

अमेरिकाय् च्वना भ्रष्टाचार विरुद्ध थीथी अभियानत न्ह्याकाः वयाच्वंगु संस्था हेम सरिता पाठक फाउण्डेशनं नं ऐक्यबद्धता प्वंकूगु खः ।

अमेपरकाय् च्वना नं नेपाःया भ्रष्टाचार अन्त्यया नितिं थीथी ज्याझ्वःत न्ह्याकाः वयाच्वंगु उगु फाउण्डेशनं विज्ञप्ति पिथनाः डा. केसीयात तत्काल त्वःतेत माग तकं याःगु दु ।

विज्ञप्तिइ अदालतप्रति थःपिनिगु नं उच्च सम्मान दूगु व सकल नागरिकं अदालतया सम्मान यायेगु सकलसिगु दायित्व जूगु जूसां नं सुं व्यक्तिं अदालतय् च्वनाः खराब ज्या यायेत्यन धाःसा वप्रति पतिं धस्वाकेगु नं सचेत नागरिकया दायित्व जूगु न्ह्यथनातःगु दु ।

भ्रष्टाचार याइपिं बाय् भ्रष्टाचारीयात ग्वाहालि यायेत्यंम्ह व्यक्ति सुयागु नं मजुइगु मान्यता ज्वनाः न्ह्यज्यानाच्वंगु संस्थां न्यायालय बाय् प्रशासनिक क्षेत्र न्ह्यात्थाय् जूसां नं नागरिकपिन्सं खबरदारी यायेवं आत्तेजुयाः खोरय् तयेगु सिबें जनहितया नितिं ज्या यायेमाःगुलि संस्थां बः ब्यूगु दु ।

नेपालय् लखौं मुद्दात लाइनय् दूगु इलय् डा. गोविन्द केसीया मुद्दा धाःसा नाटकीय रुपं न्ह्यःने यंकूगुलि नं फाउण्डेशनं अजूचाःगु खँ तकं प्वंकूगु दु ।

फाउण्डेशनं नेपाःया भ्रष्टाचार अन्त्यया नितिं दँय् दसं भ्रष्टाचार विरुद्ध उत्कृष्ट च्वसा न्ह्याकूम्ह पत्रकार, साहित्यकार व राष्ट्रसेवकपिन्त तकं प्रोत्साहन कथं पुरस्कृत यानाः वयाच्वंगु दु ।

फाउण्डेशनं भ्रष्टाचार विरुद्ध अभियानया नितिं थीथी सांगितिक म्येत तकं पिथनाः वयाच्वंगु दु ।

Categorized in अन्तर्राष्ट्रिय