nepal life

डाइटिङ मयाःसे तौल नियन्त्रण यायेगु १० गू काइदा !

२०७४ पौष ९, आइतबार १४:५७:४६

थौंकन्हय् सकसिगु ध्यान म्हगःयात गुकथं फिट एण्ड फाइन तयेगु धैगुलि । खासयानाः म्हगःयात चुस्त व आकर्षक दयेकेगु चक्करय् यक्वस्यां थःगु नसा नयेगुलि कटौती यानाच्वंगु दु । इमिगु प्लेटया खाना म्हो जुयाच्वंगु दु ।

मेनुइ व्यापक कटौती जूगु दु । नये यःगु नसा तकं त्वःते मालाच्वंगु दु । कारण, ओभर डाइटिङ जुइगु ग्याःचिकुं यानाः ।

थौंकन्हय् सर्वत्र छु ट्रेन्ड दु धाःसा, यक्व नलकि ल्ह्वनी, उकीं कम जक नयेमाः । स्लिम जुइ चाहेजूपिं ला नसाज्वलंपाखें बिस्युं वनाच्वंगु दु । जबकी म्हगःयात माःगु पोषण तत्व धैगु नसा ज्वलंया माध्यमपाखें प्राप्त जुइगु खः ।

यदि नसा नयेगु त्वःतल धाःसा म्हगलय् पोषणया अभाव जुइ । झीगु म्हगःया कार्यसंचालन बांलाक्क जुइखनी मखु । झीपिं उर्जाहीन जूवनी । उकिं स्लिम जुइगु चक्करय् नयेगु नसाय् कटौती यायेगु मखु । थुकिया अर्थ थ्व नं मखु कि, लाक्वपाक्व नयेमाः ।

स्वास्थ्ययात हानी याइगु नसात बर्जित हे यायेमाः । अय्सां स्वास्थ्यया नितिं माःगु भोजन धाःसा कायेमाः ।  अथेला डाइटिङ याइपिनिगु नितिं थन काइदाया उपाय दु । इमिसं ठोस नसा सेवन यायेगु आवश्यक मतायेकल धाःसा तरकारीया जुस त्वने फइ । थ्व सर्वोत्तम विकल्प खः । थुकिया छुं लाभ दु ।

  • म्हगःयात माःगु पोषण प्राप्त जुइ ।
  • सुपाच्य जुइगु जूगुलिं पाचन यन्त्त बल्लाइ ।
  • म्हगलय् अनावश्यक मोटोपन अप्वइ मखु ।

 

गथे यानाः त्वनेगु ?

झीपिं फलफुलया जूस त्वनेत अभ्यस्त जुयागु दु, तर तरकारीया जूस म्हो जक त्वनेगु याइ । तर, तरकारीया जूस झीगु स्वास्थ्यया नितिं अतिकं फाइदाजनक जुइ ।

आः नकतिनिया छगू अध्ययनं लुइकूगु दु कि नियमित रुपं तरकारीया जूस त्वनीबलय् याकनं हे तौल नियन्त्रण जुइ । डाइटिङ याइपिं मनूतय्गु नितिं तरकारीया जूस अतिकं लाभकारी जुइ ।

१. खाइककःचा (करेला)या जूस त्वनेबलय् खाइसे च्वनी, तर थ्व जूसं म्हगलय् मुनाच्वंगु दाःयात नायेकाः यंकीगुलि ग्वाहालि याइ ।

२. खाइककःचाया जूसय् कागतीया रस तयेबलय् झन हे फाइदा जुइ ।

३. तौल कम यायेत तुसिया जूसं नं महत्वपूर्ण भूमिका म्हितेगु याइ । उकिं तौल् जक म्हो याइगु मखुकि छ्यंगू नं चम्के याइ ।

४. न्हिथं सुथय् छगू गिलास लौकाया जूस त्वनेमाः । थुकी अत्यधिक फाइबर व म्हो क्यालोरी दइ ।

५. बन्दाकोभीया जूसं नं तौल घटेयायेगुलि ग्वाहालि याइ । उकिं न्हिथं छगू गिलास बन्दाकोभीया जूस त्वनेगु यायेमाः । बन्दाकोभीया जूसय् फ्याट म्हो याइग्ु तत्वत दइ ।

६. नियमित रुपं २–३ महिनातक २५० ग्राम टमाटरया जूस त्वनेबलय् नं तौल कम जुइ ।

७. भिटामिन, प्रोटिन व कार्बोहाइड्रेडपाखें भरपूर ब्रोकाउलीइ नं फ्याट्स विल्कुल दइमखु । थुकिया जूस पिकयाः त्वनेफइ  बाय् तरकारी दयेकाः नये नं फइ ।

८. वाउँगु सागया जूसं नं वजन कम यायेगुलि ग्वाहालि याइ । थःगु स्वाद कथं वाउँगु सागया चयन यायेफइ ।

९. आरुबखडाया जूसय् कागतीया रस ल्वाकछ्यानाः त्वनेबलय् नं तौल कम जुइ ।

१०. नियमित रुपं आरुया रस त्वनेबलय् नं तौल कम जुजुं वनी ।