nepal life

ट्रम्प प्रशासनं २ लख आप्रवासीपिन्त अमेरिका त्वःतेत आदेश

नेवा: अनलाइन न्युज | २०७४ पौष २५, मंगलबार १०:४०:५५

अमेरिकी राष्ट्रपति डोनाल्ड ट्रम्प प्रशासनं २ लख आप्रवासीपिन्त अमेरिका च्वनेगु व ज्या यायेगु अनुमति रद्ध याःगु दु । मध्यअमेरिकी देश एल साल्भाडोरया २ लख मनूतय्त अमेरिका च्वनेगु व ज्या यायेगु अनुमति रद्ध याःगु खः ।

सन् २००१ स एल साल्भाडोरय् मदिक्क भुखाय् ब्वयेधुंकाः मानवतावादी ज्याझ्वः ‘टेम्प्रोररी प्रोटेक्ट स्टेटस’(टीपीएस) ब्यूगु खः ।

आः धाःसा एल साल्भाडोरया मूनतय्त अमेरिका त्वःतेत सन् २०१९ तकया ई ब्यूगु दु । उगु अवधि दुने अमेरिका त्वःताः मवन धाःसा गिरफ्तार यानाः माःगु कारवाही यायेगु ख्याच्वः ट्रम्प प्रशासनं ब्यूगु दु ।

अमेरिकां थ्वसिबें न्ह्यः हैटी व निकारागुआया द्वलंद्वः मनूतय्गु टीपीएस सुरक्षा लितकाःगु खः । ट्रम्प राष्ट्रपतिइ निर्वाचित जुइखतं अमेरिकाय् आप्रवासीपिन्त पनेगु घोषणा याःगु खः ।

टीपीएस धाःगु छु खः ?

सन् १९९० स न्ह्याकूगु छगू ज्याझ्वः पाखें थीथी देसया प्रवासीपिन्त कानूनी रुपं अमेरिकाय् च्वनेगु व ज्या यायेगु अधिकार कायेखनीगु खः । कानूनी बाय् गैरकानूनी रुपं अमेरिका च्वनीपिन्त थुगु ज्याझ्वः अन्तर्गत तयेगु याइ ।

थ्व अधिकार उगु देसया नागरिकपिन्त बिइ गुगु सशस्त्र संघर्ष, प्राकृतिक विपत्ति बाय् महामारीपाखें प्रभावित जूगु जुइ ।

अमेरिकाय् एल साल्भाडोरय् २ लख प्रवासी दु । टीपीएस कायेखंगु थ्व दकले तःधंगु पुचः खः ।

राष्ट्रपति जर्ज डब्लु बुशं थ्व कानून हयेधुंकाः आःतक अमेरिकाय् १० गू देसया ३ लख प्रवासीपिन्त टीपीएस सुरक्षा ब्यूगु खः ।

Categorized in अन्तर्राष्ट्रिय