nepal life

टि–२० विश्वकप छनौटया नितिं नेपाली मिसा क्रिकेट पुचःया घोषणा

नेवा: अनलाइन न्युज | २०७४ कार्तिक १६, बिहिबार १३:३४:५१

आइसीसी मिसा टि–२० विश्वकपया एसियाली छनौटया नितिं नेपाली राष्ट्रिय मिसा क्रिकेट पुचःया घोषणा जूगु दु ।

रुविना श्रेत्रीया कप्तानीइ बुधवाः स्वम्ह वैकल्पिकलिसें १७ म्ह दुजःया नेपाली पुचःया घोषणा याःगु खः ।

आइसीसीया प्रतिनिधि अनिमुल इस्लाम, मिजं पुचःया प्रशिक्षक जगत टमाटा, मिसा पुचःया प्रशिक्षक सामसन थापा व कप्तान रुविना क्षेत्री दुथ्याःगु छनौट समितिं नेपाली पुचःया घोषणा याःगु खः ।

नेपाली पुचःया दुजःपिं कप्तान रुविना क्षेत्री, उपकप्तान सीता रानामगर, ज्योति पाण्डे, सरिता मगर, नेरी थापा, रोमा थापा, इन्दु बर्मा, करुणा भण्डारी, सोनु खड्का, लक्ष्मी चौधरी, रितु कनोजिया, सवनम राई, काजल श्रेष्ठ व संगीता राई खः ।

अथेहे, कविता कुँवर, नितु भण्डारी व रेखा रावल वैकल्पिक कासामिया रुपं पुचलय् दुथ्याकूगु दु ।

थाइल्याण्डय् वइगु मंसीर ४ निसें ११ गतेतक सन् २०१८ य् जुइगु मिसा टि–२० विश्वकपया नितिं एसियाली छनौट जुइ । कासाय् नेपाः व थाइल्याण्डलिसें हङकङ, चीन, मलेसिया व युएई यानाः खुगू पुचःया सहभागिता दइ ।

नेपालं थःगु न्हापांगु कासा मंसीर ४ गते ग्वसाः खलः थाइल्याण्डलिसे म्हितीगु जूगु दुसा निगूगु कासा ५ गते हङकङलिसे व स्वंगूगु कासा ७ गते युएईलिसे म्हितीगु जूगु दु ।

समूहया थःगु प्यंगूगु कासा नेपालं मंसीर ८ गते मलेसियालिसे व लिपांगु कासा चीनलिसे मंसीर १० गते म्हितीगु जुइ ।

कासाया उपाधि विजेता पुचः आईसीसी मिसा टि–२० विश्वकपया ग्लोबल क्वालिफायरया नितिं छनौट जुइ ।

Categorized in कासा