nepal life

झिंन्याक्वःगु हस्तकला व्यापार मेला जुइगु

नेवा: अनलाइन न्युज – विजयरत्न | २०७४ कार्तिक १६, बिहिबार १६:५४:४०

नेपाल हस्तकला महासंघया ग्वसालय् दँय् दसंथें थुगुसी नं तःजिक झिंन्याक्वःगु हस्तकला व्यापार मेला जुइगु जूगु दु ।

थ्वहे वइगु मंसीर १ गतेनिसें ५ गतेतक न्यान्हुयंकं येँया भृकुटीमण्डपय् जुइगु थुगुसीया हस्तकला मेला झिंन्याक्वःगु खः ।  थुगुसी जुइगु हस्तकला व्यापार मेलाय् गुगू प्याभिलियनया लिसेलिसें मुक्कं २०० गू स्टल दइगु खँ बिहिवाः जूगु पत्रकार सम्मेलनय् जानकारी ब्यूगु दु ।

थथे ब्वति काःगु स्टलत व प्याभिलियनमध्ये छगू छगूयात बेष्ट प्यामिलियन व बेष्ट स्टलया सिरपाः नं बीगु ग्वसाः दूगु थुगु व्यापार मेलाय् काष्ठकला, धातुकला, लुँ वहः, उनि व सुती, ढाका, पश्मिना, हाते कागज, भ्वँया मेमेगु हलंज्वलं, छ्यंगूया हलंज्वलं, अर्गानिक च्याया लिसेलिसें आपालं उद्योग व्यवसायीपिन्सं ब्वति काइगु खँ नं पत्रकार सम्मेलनय् जानकारी ब्यूगु खः ।

आः जुइगु हस्तकला व्यापार मेलाय् लाइभ हस्तकला प्रतियोगिता नं जुइगु व थुके न्हाप लाःम्हेसित न्यय्द्वः, ल्यू लाःम्हेसित स्वीद्वः व लियांल्यू लाःम्हेसित नीद्वः तकाया सिरपाः नं बीगु खँया नापनापं समकालीन हस्तकला बस्तु, होम डेकोर व एसेसरीज अले तिसा ज्वलं नापनापं यानाः स्वंगू विधाय् नं दकले बांलाःगु बस्तुयात छगू छगू सिरपाः बीगु खँ पत्रकार सम्मेलनय् नेपाल हस्तकला व्यापार महासंघया नायः धर्मराज शाक्यं जानकारी बियादीगु दु ।

Categorized in बजाः